شرح مفصل لاستخراج القيد العائلي وبعض النصائح الواجب مراعاتها


القيد العائلي....
الكل يركز معايا لو فهمت الكلمتين دول كويس مش هتحتاج لسؤال ف القيد بعد كدا تاني
هنوضح اي حاجة مش واضحة
هنقسم الموضوع 
 
اولا: مدة القيد العائلي للكليات العسكرية والشرطة سنة من تاريخ اصداره كدا تمام ركز معايا سنه من تاريخ اصداره
 
ثانيا: ازاي اعمل قيد عائلي!!!
الموضوع سهل جدا المطلوب منك للتقديم 3 قيود
1- قيد الأب
2- قيد الجد للأم
3- قيد الجد للأب 
 
ايه الاوراق المطلوبة ؟؟؟!
انك تروح لجدك تجيب منه صورة البطاقة وصورة بطاقة جدتك وصور بطايق اعمامك وعماتك ملحوظة:(نفس الشئ يسري علي اخوالك وخالاتك انا اخدت الجد ابو الوالد كمثال)
نكمل هتجيب صور البطايق اللي متوفي منهم تجيب شهادة الوفاة بتاعته ومتنساش قسيمة جواز الجد والجدة علشان هتحتاجها معاك كدا تمام لحد الوقتي صور البطايق واللي متوفي شهادة وفاة واللي تحت السن شهادة ميلادة وبس كدا
هتعمل نفس الموضوع مع والدك صور بطايق اخواتك او شهادة ميلاد ليهم وقسيمة زواج بتاعت الوالد وصور بطايق الوالد والوالدة والمتوفي شهادة وفاة كدا خلصنا من الورق المطلوب  
نصيحة بقي الرسول (ص) بيقول استعينوا علي قضاء حوائجكم بالكتمان فإن كل ذي نعمة محسود
 
يعني ايه الكلام دا يعني محدش هيحب ليك الخير حتي لو اهلك تعمل ايه بقي علشان مترحش تقولهم عاوز صورة البطاقة وكدا وهيفضلوا يسألوك ليه وبتاع والعين بتفشخ الحجر يا صاحبي
انت هتعمل ايه معلش هتكلف نفسك شوية هتجيب ورقة وتروح تكتب فيها كل الاسماء اللي انت عاوز صورة البطاقة بتاعتهم ومين غير ماتروح ليهم خالص تطلع بنفسك علي السجل المدني التابع ليك وبدل ماتروح ودا يقولك بطاقتي ضايعة استني عليا يومين لا انت هتاخد الاسماء وتطلع ع السجل وتطلع ليهم كلهم شهادات ميلاد احسن ليك هوا ينفع !!! ايوة ينفع طبعا تطلع ليهم كلهم شهادات ميلاد وتقدمها ف الورق واللي ميت تطلعه شهادة وفاة كدا هتكون ف حالك ومحدش هيعرف عنك حاجة وهتكمل كل الورق الناقص وتروح السجل تقوله عاوز اعمل قيد عائلي لوالدي هياخد منك الورق ساعات بيطلب منك بيان زواج للوالد ب3ج بتعمله ف السجل وبتطلعه ليه علشان يتاكد ان والدك مش متجوز مثلا تاني وساعات مش بيطلبوا بس كدا هياخد الورق منك وعلي حسب المدة بقي اللي يقولك عليها وهتعمل نفس النظام للجد ابو الوالد وابو الوالدة
مش عاوزك تتوه مني لسه بدري
نصيحة من اخ انزل خلص القيود الوقتي
طب ليه انزل الوقتي ؟؟؟؟
اولا: مش هتاخد وقت يعني مثلا نزلت الاربعاء هيقولك تعالي السبت خده او تعالي بكرة عادي يعني لان مصلحة السجلات بتبقي فاضية اصلا لكن وقت التقديم مش هتعرف تقف ف سجل علي رجيلك هتلاقي كل سجلات مصر زحمة بطريقة فظيعة
ثانيا: ودي الاهم اكيد قيد الاب هيكون مفروغ فيه الكلام ومش هيبقي في غلط ان شاء الله
بدري تاني ليه بقي علشان ايام زمان المواليد ساعات كانت بتتسجل غلط يعني مثلا ممكن تلاقي اسم عمك ف البطاقة (احمدمحمدمحمدحامد) لكن هوا فالاصل وبطايق اخواته (سعيدمحمدحامد) كدا بقي جد عمك اسمه محمد مش حامد وبكدا مش هيظهر ف القيد العائلي وهيعملك مشكلة ف التقديم علشان كدا بتبدا انت تشوف الاسماء وتراجعها كويس ممكن يكون حد اسمه غلط ممكن يكون الغلط ف اسم الام ف الشهادة متركزش مع البطاقة وتنسي الشهادة علشان كدا بقولك طلع شهادة ميلاد احسن مكتوب فيها بيانات الام والاب ممكن تلاقي اسم الام مثلا ف الشهادة نجية لكن هوا ف الاصل تحية صدقوني حرف بيفرق ع الكمبيوتر كدا مش هيظهر ف قيد جدك لان امه اسمها نجية مش تحية فانت تجري علشان تعدل الاسم وتخليه الاسم الصحيح كل دي امثلة كتير فابدا من الوقتي وربنا معاك
زهقت انا عارف من كتر الكلام انا عارف بس الموضوع طويل وعاوز صبر شوية 
ندخل علي النقطة الاخيرة  
 
التعذر : ناس كتير بتقول مانا اعمل تعذر واريح دماغي ولا اعدل اسماء ولا اتعب نفسي تمام ركز معايا
التعذر مقبول ف الجدين بس لكن قيد الاب لازم يكون موجود بس برضوا الجدين لازم يكون فيه شروط للتعذر تعالوا معايا نراجع السنين اللي فاتت مع بعض  
 دفعة 112 حربية سنه 2015 كان لو عندك اسماء غلط كان ممكن تعمل تعذر عادي ومن اي مكان السجل التابع ليك وتقدمه مع الورق وكان ممكن تقدم قيد ورقي عادي للجدين فقط لكن الوالد كمبيوتر تمام كدا
دفعة 113 حربية سنه 2016
الوضع اتغير جدا جدا جدا لو عندك اسم غلط الظابط بيقولك تروح تصححه وتيجي التعذر مش بيتقبل للاسماء الغلط وكمان علشان تعمل تعذر كان فيه شروط كتير كدا ومكنش بالساهل يعني التعذر كان مسموح بس لو حد من اجدادك ملوش بيانات ع الكمبيوتر ازاي اولا التعذر كان اتوقف من المحافظات وعلشان تعمل تعذر لازم تروح مصحلة السجلات العامة في العباسية بعدين بتسحب استمارة تعذر كدا وتملي البيانات وتروح للظابط يقولك ايه المشكلة عامل التعذر ليه هتقوله مثلا عندي اسماء غلط هيقولك لا مفيش روح صحح الاسماء هتقوله مثلا جدي ملوش بيانات ع الكمبيوتر شهادة ميلاد مثلا مش لاقي هيقولك هتطلع ع دار المحفوظات وتشوف ليه شهادة ورقية من هناك طلعت مش هتعمل تعذر مطلعتش هتاخد كعب من دار المحفوظات ان البيانات مفقودة ف هتاخده وترجع العباسية للظابط يختملك التعذر بختم العباسية لازم ختم العباسية وهتحطه ف الملف وخلص الموضوع لو طلعله بقي شهادة ورقية دي لفة تانية هتروح تضيف ليه بيانات ع الحاسب ف العباسية علشان يطلعولك القيد بعدها دا كان بالنسبة للتعذر ف 2016 ومكنوش بيقبلوا قيد ورقي
فكل سنه بتختلف عن الثانية  
نصيحة بقي
بدل كل اللف دا قوم وامشي ف الورق الوقتي علشان متقعش ف كل الحوارات دي
واسأل مجرب وانا معاكوا ف الكومنت لاي استفسار
بالتوفيق .

نصائح التقديم - مجموعه من النصائح التي سوف تساعدك علي التقديم للكلية الحربية والشرطة





نصائح للالتحاق بكليات القوات المسلحه وكلية الشرطه

اولا : الناحيه الطبيه الطبي اهم اختبار واصعب اختبار لكل الطلاب ليه اصعب اختبار ؟ هو مش اصعب اختبار ولا حاجه كل الطلبه بتخاف منه ال عنده وال معندهوش حاجه بيخافوا منه لانه اكتر اختبار بيصفي طلبه كتير جدا ودا بيكون لسبب طبي طبعا 
 
ثانيا : الرياضي بيحدد مدي ليقتك البدنيه مجموع درجاته 200 النجاح فيه من 100 + انك تقفز قفزة الثقه ودي اجباري والسباحه اختياري لو مبتعرفش تعوم هيتخصم منك 20 درجه بتعرف بتكون ع حسب بقي عومت نص الحمام ودا درجته من 10 عومت الحمام كله ف الوقت المطلوب ودا درجته من 20 عومت بس مش ف الوقت المطلوب هتاخد 15 درجه بقية الاختبارات زي الضغط - البطن - العقله - الجري - التوازن كلها بتعتمد ع الاستمرار يعني كل يوم العب شويه ضغط وبطن وعقله واجري شويه هتلاقي نفسك بتتحسن فيها مع الوقت مش محتاجه عصب بس ف ناس عصبها حديد بس لو مش بيلعب ضغط وقولتله تعال العب مش هيجيب خمس عدات

ثالثا : المجموع مجموعك دا يعتبر من النقط المهمه جدا جدا ال بتخلي فرصتك كبيره اوي لقبولك ف احدي الكليات العسكريه سؤال : يعني ايه يفندم هو مش انا ال بحدد رغبتي ؟ طبعا انت ال بتحدد رغبتك لكن اكتر الناس فاهمه ان تحديد الرغبه دا بيكون ع كليه واحده او ان طالما رغبتي اني عايز حربيه يبقا هدخلها . لا طبعا الموضوع مش كدا الوقت دا بقا مجموعك هو ال بيحددلك انت ليك كام كليه يعني مثلا : احمد جايب 97% واحمد بيعرف يعوم ونظره 6/6 اذا احمد ليه ( طب عسكري - فنيه - حربيه - دفاع جوي - جويه - بحريه - معهد فني قوات مسلحه ) كل الرغبات دي بتتحط ف الملف لكن بترتبهم ع حسب الرغبه ال انت عايزها .. يعني عايز طب عسكري تكتبه ف الاول وبعد كده تكتب بقية الرغبات ع حسب ال انت عايزه بعد الطب العسكري سؤال : مين ال بيحددلي الكليه ال هتناسبني ؟ اختبار الهيئه هو ال بيحددلك وبيكون ع حسب لياقتك البدنيه والطبيه وشخصيتك + ملفك بيكون موجود قدامهم وبيكون مدير كل كليه موجود ف اختبار الهيئه

الكلية الحربية

عرض المزيد »

كلية الشرطة

عرض المزيد »