نصائح التقديم - 10 نصائح تساعدك بالنجاح في الكشف الطبي لا تهملها



إزاي تنجح في الكشف الطبي ؟
مبدأيا من أصعب الكشوفات اللي هتشوفها ولو عندك مشكله مستحيل تدخل بس في ناس بتكون صحتها كويسه وتسقط ومتعرفش ليه هقولك علي نصائح ان شاء الله تكون سبب في نجاحك
  1. نظافتك الشخصيه في ايام الكشف . . كلنا فاهمين ومش هطول .
  2. تقوم حالا تعمل تشيك اب علي نفسك . كل حاجه زي انف واذن وحنجرة و باطنه و عظام و رمد وركز علي الرمد خليه يكشف علي قاع العين وعلي مستوي النظر ويطمنك واعمل رسم قلب واعمل تحليل زي صورة دم كامله و سكر ووظائف كبد ووظائف كلي وتحليل بولمعلش النقطه دي كبيرة بس هنتكلم فيها برضه ليه اكشف ده كله ؟ ده مكلف جدا ؟ هستفاد ايه ؟اقولك احيانا بنكون عندنا امراض واحنا منعرفش كشفك في الملكي هيساعدك علي اكتشاف المرض وعلاجه قبل ماتقدم وبالتالي مفيش حاجه هتسقطك .
  3. هيتطلب من حضرتك تغسل الاذن قبل الكشف ماتغسلش اذنك وخلاص خلي الدكتور يشوف ودنك محتاجه غسيل ولا لا عشان في بعض الاحيان غسيل الاذن بيسبب التهابات .
  4. وانتا بتكشف بلاش تجري او تستعجل في المشي هتلاقيك داخل عيادة القلب ودقات قلبك سريعه هتسقط فامشي براحتك وبلاش توتر طب لو حصل انك نسيت وجريت واتفاجئت اسأذن من الظابط الطبيب ايلي معاك وعرفه انك كنت بتجري برا هيكشف عليك تاني .
  5. في كشف الجلديه بلاش توتر عشان العرق وانتا داخل امسح ايدك في هدومك بتكون قاعد في الحر وعرقان او ماسح عرقك بايدك فالدكتور هيفتكر ان ايدك بتعرق .
  6. في الرمد متحاولش تحفظ العلامات اي اتجاه عشان بتتغير وانتا هتجاوب غلط وهتسقط ركز في العلامات وخد وقتك بس ماتستعجلش وتقول اي اجابه احنا مش في مسابقه .
  7. اشرب مياه كتير هتنفعك في كشف السونار وهوا بيكشف علي الكلي وفي التحاليل .
  8. بالله عليك ياخي وانتا رايح للتحاليل بلاش تلعب رياضه قبلها ب 4 ايام طب ليه ؟ لما حضرتك بتلعب لياقه وتحمل علي نفسك الكبد بيفرز انزيم alt بزياده فبالتالي بيبان ان عندك انزيمات الكبد عاليه وهتسقط بلاش رياضه عشان انزيماتك تكون في الطبيعي (هاااااام جدا) .
  9. بلاش تاكل او تشرب اي عصير يوم التحاليل عشان نسبة السكر حتي لو انتا جاي من الصعيد مش هتموت من الاكل بس لو السكر طلع عالي هتزعل .
  10. واخير بلاش سهر ونام بدري في اليوم ايلي قبل الكشف عشان لما تقوم تبقا فايق وعينك مش حمرا او تلتهب .
دي نصايح أتمني تعملوا بيها وإن شاء الله ربنا يوفقكم جميعا