الكشف الطبي للكلية الجوية بالتفصيل


الكشف الطبي الخاص #بالكليه_الجويه

يختلف الكشف الطبي الخاص #بالكليه_الجويه تماماً عن الكشف الطبي للكليه الحربيه
__________________
- الأول لو انت الحمد لله عديت طبي حربيه تمام ومرشح جويه هتكشف اول يوم ضغط واشعه عالفك وتاني يوم عيادات 
- لو لا قدر الله طلعت من طبي حربيه واتحولت جويه هتكشف اول يوم عيادات و تاني يوم ضغط واشعه عالفك
يوم العيادات بيكون زي زي اول يوم طبي حربيه 
بتخش تكشف فكل العيادات بس فجويه مفيش التماس البيطلع فكشف مش بيكمل يأما بيقوله كمل حربيه لو لائق حربيه او مفيش نصيب وهات كارت التردد لو غير لائق حربيه
كشف الضغط
عباره عن غرفه زي الغواصه فيها كراسي مرصوصه فوش بعض وفي شباك ازاي علشان الظابط يشوفكوا من بره هتدخلوا وتقعدوا وفي واحد منكم الظابط هيختاره علشان يلبس سماعات علشان يديك الأوامر هتاخد معاك لبانه وبس مش هتاخد معاك اي حاجه تانيه لا ازازة مايه ولا ولاعه ولا اي حاجه هتحط اللبانه فوقك وتبدأ تمضغها الهتحس بيه فحالة انك سليم ان حد دايس علي ودانك بصباعه ومجرد متبلع ريقك هتلاقي الضغط ده راح او متخرج في دكتور انف واذن هيكشف عليك وهو هيحدد ازا كنت فئه أ او ب أو ج ومن هنا بيبدأ التصنيف خلصت علي خير بتروح تعمل حاجه اسمها اشعه عالفك
ادي كدا اول يومين
الأيام الجايه بقي بتبقي انت وحظك يعني ممكن انت انهرده عندك كشف وصاحبك عنده كشف تاني لان في كشوفات مثلا الدكتور بيبقي مشي فبتأجل لتاني يوم
الكشوفات الباقيه بقي عباره عن
- يوم تحاليل وده بتاخد فيه علبتين واحده لعينة البول وواحده لعينة البراز وبتسلم العينتين وتطلع الدور الثاني علشان تحليل الدم النتيجه بتطلع فنفس اليوم او بيقولك تعالي بكره اعرف النتيجه 
- يوم اشعه وده بيبقي اشعه عالصدر والحوض والعمود الفقرى
- يوم رسم قلب ومخ وسمع ورسم السمع ده من اصعب الكشوفات
رسم القلب عباره عن ان الدكتور بينيمك ويحطلك جيل علي جسمك ويعملك سونار لو نجحت هيقولك روح لمدام منى قولها رسم قلب بتنام وتحط جيل تاني ويتحطلك مشابك فأيدك ورجلك علشان رسم القلب
رسم المخ ده سهل جداً المطلوب منك انك تكون مسترخي وبس الدكتور هيلبسك زي خوزه قماش فيها اخرام وهيحط من الأخرام دي جيل وهتغمض عينك وتسترخي خالص
***رسم السمع وده ارخم كشف هتقابله والكشف الوحيد المسموحلك تعيده عباره عن غرفه بتدخل جواها وبتقعد علي كرسي وفي سماعه بتحطها علي ودانك وفأيدك جهاز شبه الأستوب واتش المطلوب منك انك كل متسمع صوت تضغط علي زرار فالأستوب واتش المعاك الأصوات بتكون ضعيفه جداً بالكاد مسموعه
- يوم للنفسي وده ارخم يوم واطول يوم انت هتقابله وده عباره عن 7 كشوفات الاول بتقعد علي جهاز كمبيوتر وبتجيلك فيه 6 اختبارات
1- 120 مسئله جمع وضرب وطرح وقسمه زمن الأجابه ميعديش 4 ثواني 
2- اشكال ناقصه وانت تكملها 
3- عدادين واحد للأرتفاع وواحد بصله بتشوف قرائت العدادات وبيجيبلك 4 اختيارات 
لشكل الطائره وانت تختار المفروض فوضع العدادات ده الطياره شكلها ازاي وباقي 
4- اشكال ناقصه تانيه وانت تكملها
اكشوفات كدا
خلصت خلاص الاسئله العلي الكمبيوتر بتروح لجهاز المحاكاه بتركب طائرتين واحده اكنك راكب طياره بجد وبتاخد التعليمات من عسكري بره وطائره تانيه فيها اختبارات التوازن والتوافق بين العين والأيد والرجل 
هيبقي يوم طويل خلصته علي خير هتستني النتيجه تظهر 
يأما هتخش #عرض_عام نفسي فنفس اليوم او اليوم البعده
عرض عام نفسي ده زيه زي الهيئه بتخش تعرف نفسك وانت فارد ايدك الأتنين لقدام والدكتور بيسئلك كام سؤال شبه الحدود والعواصم او مسائل ضرب انا سئلني 9X4 بكام وبعد ميسئلك هيشوف ايدك ازا كانت عرقت او لا لو عرقت للأسف بتطلع لو معرقتش يبقي هتكمل
بتيجي تاني يوم عرض عام انف واذن
كدا يعتبر الكشوفات خلصت للفئه ب و ج 
نيجي بقي للفئه أ ودول بيبقي ليهم كشوفات زياده
يوم للضغط العالي وده البيطلع فيه كويس بيفضل فئه أ البيتعب بينزل ب أو ج وبعديه اشعه عالفك
- يوم عرض عام نظر واشعه عالقرنيه ومجال رؤيه 
الأشعه علي القرنيه دي انت بتقعد علي جهاز وتبص فعدسه مفيش 5 ثواني وبتقوم وبتطلع اشعه فيها كل حاجه فعينك بالتفصيل
مجال الرؤيه ده عباره عن نصف كره فيها فالنص لمبه العسكري بيطفي الأوضه كلها وانت بتحط دماغك علي ساند علي اول نصف الكوره دي هيغميلك عينك برقعه بتاعة القراصنه وهتبص بعينك التانيه علي اللمبه دي فأيدك جهاز شبه الأستوب واتش هتشوف ومضات ضوء بتنور المطلوب منك كل متشوف ومضه تتك علي الزار الفأيدك
عرض عام نظر ده عباره عن مجموعة كشوفات لوحة علامات وكتاب لعما الألوان و قاع عين واختبار الحول عباره عن مسطره طويله فيها مسمار متحرك فنصها بيحط طرفها علي انفك ويحرك المسمار وانت لازم عينك تكون علي المسمار
كدا يعتبر انت خلصت كل حاجه تقريباً 
- نيجي بقي لأهم كشف #عرض_عام_قائد
وده برده زي الهيئه بالظبط بتطلع في اسانسير مع حظابط سيد الناس الراحت المجلس الطبي الجويه عارفاه كويس
هتقعد فمكتب كدا وتقلع هدومك معادا السلب الأبيض وهتفضل مستني لحد مفي لواء طبيب الهو مدير المجلس الطبي الجويه هيخش يكشف عليك بنفسه كل الكشوفات بتاعة العيادات علي السريع 
كشف عليك وطلعت تمام هيخرج هو يروح علي مكتبه وانت هتلبس هدومك وهتطلع تقف فالصف وتدخله اول متدخل هتقف ثابت وهيبص عليك كدا وهيسئلك شويه اسئله ده زيه زي الهيئه بالظبط اكنك فالهيئه والكشف ده هو بيشوف ملفك وبيشوف لو في اي ملاحظات او اي حاجه ممكن تطلعك 
لو سئلك فحاجه تجاوب بصراحه ومتخفش وتتكلم معاه كويس 
هيسئلك شويه اسئله شبه عواصم المحافظات و ممكن يديك اسامي 3 رسل ورتبهملي من حيث النزول
عجبته وطلعت تمام هيختملك الملف ويبقي كدا مبروك انت لائق جويه
لو فئه أ هياخد معاك من 9 لـ 11 يوم كدا
لو ب او ج هيكون اقل
وكدا تنتهي رحلتك فالمجلس الطبي الجويه
بالتوفيق للجميع

28 facebook

يعني ممكن ارجع اكمل اختبارات حربيه بعد ما حولوني جويه

ينفع اقدم اعتذار اني مش عايز جوية ؟

طب العنوان فين بالظبط. اركب ايه من السيده عائشه
و شكرا للافاده

ممكن بعد ازنك لو تشرفت ترن عليا ع الرقم دا 01023423993 .. 01149038655 انا هسأل في كذا حاجا بالله عليك معلش انا محتاجك ضروري انا مش لاقي حد يفيدني في الاسئله دي بجد فعلا......

هو المجلس الطبي العسكري الجوب اجازه غدا الخميس لكشف المرشحين للجويه

عندنا الجروب تسال عليه تستفاد وتفيد غيرك او تكلم حد من الادمنز خاص الجروب
https://www.facebook.com/groups/7arbya.4orta.II

طب انا عديت كل الاختبارات ف الحربية واترشحت جوية وخت لائق أ وكتبت رغباتى جوية وبعدين حربية رسالة الهيئة جتلى امبارح بس انا عاوز اعرف انا اتقبلت ف كلية اية ولا اية الدنيا

لسه مفيش قبول دي مجرد رسالة ولسه هيتحددلك رياضي متقدم وطبي متقدم

لو عندي وحمه في الرجل تتطلعني من الجويه ؟

هو لازم عشان اخش جويه ابقي لائق في الحربيه

عندي جرح بسيط اشبه بالخربوش طوله 7 سم هل يمنع قبولي بالكليه الجويه

ممكن يكون وزن الجسم أو الجسد أو النحافه تكون سبب في عدم قبولك ف الكليه الجوية

هو انا اقدر اقدم علي اكتر من كلية عسكرية واحدة في نفس السنة يعني مثلا شرطة و حربية و جوية ؟؟

هو انا لازم اتاهل من جربية لي جوية ما ينفعش اقدم جوية علطول

عايزة اعرف ميعاد تقديم الملف امتى ولو حد كان ساحبة ع اساس حربية بس المجموع اقل من 70% ينفع يتقدم لجوية ؟ وايه ظروف الناس اللي عندها دور تاني .. ولو في اي رقم نتصل بيه ع نستفسر اكتر معلش

لو حد عندة دور ثاني ممكن يقدم ولا ماينفعش

لو حد عندة دور ثاني ممكن يقدم ولا ماينفعش

لو عاامل استئصال ل اللحمية بتخرج طبي جوية

هو عنوان مجلس الطبى الجوى تحديدا

السبت اللي بعد العيد
بيترشح لجويه
اللي عنده دور تاني بيجيب بيان درجات

انا بمتحن دلوقتي جويه وانا ثالث يوم ممكن اعرف هيبقي في ايه

انا عايز اعرف الكشف الطبى بيبقا تقريبا كام يوم تقريبا ومنفصلين ولا ورا بعض ؟؟

طب انا نظري ضعيف ٥/٦ ممكن اقبل ولا اب

ابني كان مقدم حربيه وبعد كده رشح الكليه الجويه نجح في أهم اختبار الضغط وفي كشف الجراحه نزل مع العلم أنه كان عامل عملية فتاك وهو 6سنوات ومش ماثره في حاجه وبيلعب جم وحديد رياضي يعني
هل يوجد التماس في إعادة الكشف
لأن الكليه الجويه كانت حلم حياتنا كأسره
أرجو الرد

الكليه الجويه بتقبل من ثانوي صنايع انا جيب 63 قسم العماره ينفع أقدم ولا ايه