تجارب التقديم - تجربة شخصية للتقديم للكلية الحربية مقدمة من محمد شعيب




السلام عليكم ورحمة الله وبركاته

اعرفكم بنفسي انا محمد شعيب متابع معاكم بصفحة التقديم والموقع وبساعد علي قد مقدرتي
وفي يوم من الايام قدمت للحربية زي زيكم انا كنت خريج دبلوم فني 5 سنوات قسم حاسب الي
وبعد التخرج وفي الاجازة بدات اسال ناس واستفسر عن الحربية وشروطها واوراقها ... الخ لحد ما وصلت لللصفحة والجروب دول ولقيت ناس محترمة وناس متعاونة مع بعض وفعلا استفدت كتيير وحضرت كل المطلوب ويوم سحب الملف روحت سحبت الملف وفعلا لقيت كل الي اتقالي هناك ومعاملة الضباط كويسة جدا هناك ولما بدات املاء بيانات الملف لقيت حاجات كتيير مش واضحة بدات اسال تاني بالجروب والناس تفهمني وفي مرة غلطت في ورقة ولما سالت الناس قالولي روح هات ورقة غيرها عشان ممنوع الشطب وبالفعل روحت وجبت ورقة تانيه وركبتها مكان الي شطبت فيها واخدت الملف بعد ما خصلتة ورحت قدمت اول مرة رجعت عشان الاختام بالملف مش واضحة جبت ورق جديد وبدلتة مكان الورق الي فيه اختام وضبطت الاختام ورجعت اقدم الملف تاني وتم قبولة فعلا تاني مرة ودخلت اختبار السمات وكان سهل جدا وكلة معلومات عامة وحليت فعلا زي ما اتقالي في 5 دقايق الي اعرفة حليته والباقي بالبركة مش مشكلة المهم تحل الكل وسلمت الاجابات وروحت وانتظرت فترة ما بين اسبوع او اكثر شوية ولقيت الرسالة بتاعه النجاح في السمات وان عندي اختبار طبي في اسكندرية في مستشفي مصطفي كامل العسكري المهم انا روحت المستشفي قبل الاختبار بيوم ودخلت استفسرت عن كل شي ومكان الاختبار وحجزت في فندق هناك وفضلت لحد تاني يوم للاختبار عشان بيكون من بدري وفعلا من الساعه 5 الصبح روحت المستشفي للمكان المطلوب الدخول بكرت التردد والبطاقه وممنوع الفون او اي اغراض غير المطلوبة دخلنا قعدنا في مظلة لحد ما جا دوري دخلت مع مجموعتي ولفينا علي كل كشف وعديت الكل لكن مع الاسف طلعت في الرمد والانف انا ما اعترضتش وقولت الحمد لله وروحت بيتي طبعا مفيش التماس للي يسقط في كشفين المهم قولت اقدم تاني سنه وفعلا قدمت تاني سنه وللاسف سقطت سمات مع ان الحل كلة صحيح لكن انا اعتقدت انهم طلعوني عشان سقطت قبل كدا في اختبار طبي علي كل حال دي حكايتي مع الحربية اتمني انكم تشاركوا تجاربكم معانا برضو بدون اي مشاكل ومراعاه الجدية في الحوار
بالتوفيق

1 facebook:

هو لو انا من الاسكندرية الكشف الطبي بيكون ف الاسكندرية ولا لازم اسافر القاهرة ؟