اسئله شامله باجابتها لتقديمات ثانوي ف الجيش والشرطه



الموضوع عباره عن الاتي :

اولا : اسئله خاصه بمواعيد وسحب الملف

ثانيا : اسئله شامله لبيانات الملف وعن الاوراق المطلوبه ف الملف سواء مؤهلات او قيود ... الخ

ثالثا : اسئله وشرح وتوضيح ليوم سحب الملف

-------------------------------------------------------

س1- سحب الملف الحربيه وشرطه هيبدا امته ؟

الكليه الحربيه هتيبدأ : ف شهر 7

كلية الشرطه هتبدا امته : ف اخر 7

س2 : الدخول من بوابه كام ؟

- سحب وتسليم

اولا : السحب بوابه 3

ثانيا : التسليم بوابة الاستاد

س3 : ممكن اخد الفون عادي معايا ؟!

اه ممكن تاخده بس هتسلمه ف الامانات مش هتدخل بيه

س4 : ايه المطلوب لسحب الملف ؟! ولازم اكون حالق شعر ودقن ؟!

بالنسبه للحربيه

اولا : هتسحب الملف بالبطاقه فقط 

ثانيا : مش لازم بس الافضل تكون حالق لانك هتتصور والصور هتدبس ف الملف ( خفف ) وممكن لو لقي شعرك طويل او دقنك طويل هيتنك عليك ويقلك دا منظر واحد عاوز يعيش الحياه العسكريه

بالنسبه لكلية الشرطه

هتسجل ع النت الاول وبعد كدا هيحددلك معاد تسحب فيه الملف هتاخد معاك البطاقه و ثمن الملف وطبعا هتجمع معلومات اسرتك ف ورقه وهتاخدها معاك بالاضافه الصوره ال هتطبعها بتاعة رقم الملف ال بتظهرلك لما تسجل ع النت وشهاده الثانوي

س5 : ايه ال هيتم ف يوم سحب الملف ؟!

هتروح بدري وتكون هناك الساعه 6 او 7 بالكتير عشان تنجز وتخلص بدري وتكون حالق وظابط حالك ولابس لبس كويس ومحترم وممكن تاخد الفون معاك عادي هتدخل من بوابه رقم اربعه هيشوف بطاقتك وانت داخل ع البوابه بعد كدا هتدخل هتقعد ع كراسي تخت مظله ع حسب تخصصك والضابط بيشرح الاعلان وبيقول ع التخصصات المطلوبه بحيث لو تخصصك مش مطلوب متسحبش وتخسر نفسك بعد كدا هتتوجه ع منافذ بيع الملف هتديله بطاقتك  وبعد كدا هتتوزن وهيقيس طولك بعد كدا هتروح تتصور وبعد ما تتصور هتدخل قاعه الضابط هيشرحلك ملئ الملف ف انت تكون مركز وتراجع ملفك ورقه ورقه عشان سعات بيكون ناقص ولو لقيت ورقه ناقصه هتلاقي ف عسكري قاعد هتاخد منه الورقه الناقصه بعد كدا هتستلم صورك ومع السلامه تروح

س6 : لو ف بيانات الاعمام الاخوال الخانات مش مكفيه اعمل ايه ؟!

هتجيب ورقه خارجيه وهتسطرها زي ال ف الملف وتكتب فيها الزياده وتدبسها ف الورقه ال ف الملف

س7: بالنسبه للاتنين الشهود اجبهم منين ؟؟

اي اتنين موظفين ف اي مصلحه حكوميه ( مدرسه - معهد - كليه - اي اداره حكوميه) يمضوا والمدير يمضي ف خانة الشاهد التالت ويختم بختم شعار الجمهوريه

وتتاكد من انهم كتبوا ارقام بطايقهم

س8 : لو والدي / والدتي احدهم متوفي اكتب ايه ف ورقة بيان حالة الوظيفه ؟!

بص اي حد متوفي سواء والدك او والدتك او اي حد قريبك بص ع الورق ال ف الملف الخاصه بيهم فوق وتحت لو لقيت جمله ( تملي البيانات ف حالة الوفاه ) يبقا تكتب وظيفته او مؤهله او اي حاجه مطلوبه منك قبل الوفاه

س9 : لو والدي / والدتي بالمعاش اكتب ايه ؟!

زي موضحتلك ف السؤال ال قبل دا تبص فوق وتحت لو طالب منك تملي البيانات بتعته هتملاها من وظيفته ال كان فيها قبل ما يطلع ع المعاش مش من المعاشات

ولو مطلبش هتجيب سيرك بالمعاش بتاعه مختوم وتدبسه

س10 : طب بالنسبه لختم المعاشات سعات مبيكونش واضح ؟!

حاول تعرف المكتوب ف الختم لان ممكن الظابط هناك لو شافه مش واضح هيقلك اقرا المكتوب ومتقلقش

س11 : احسب سني ازاي ؟!

هتحسب سنك من ساعة ما اتولد باليوم والشهر والسنه لغاية 1/11/2017 هتنقصه

س12 : طب بالنسبه لسن الاقارب احسبه ازاي ؟!

هتحسب سنه من ساعه ما اتولد بالسنين فقط لغاية 1/11/2017 او لغاية الان عادي

س13 : طب انا معاد تسليمي عدي اعمل ايه او معاد تسليمي يوم كذا ومش هلحق اقدم ف المعاد ال مكتوب ع الملف ؟!

بص انت ليك تقدم ف اي يوم بعد المعاد المتحددلك ع الملف لكن مينفعش قبله ومعاك لغاية 29 ديسمبر

س14 : طب ورقة حسن السير والسلوك اختمها منين ؟!

من كلية حضرتك وتاخد الملف معاك وانت رايح

س15 : طب بالنسبه للتحريات هتبدا من امته ؟!

التحريات بتبدا من ساعة ما تسلم ملف المرحله التانيه وكورسات التعارف لان الكورسات دي بتتوزع

واحده للامن الوطني تقريبا وواحده للمدريه وواحده للقسم التابع ليهم الطالب ف محافظته

بالنسبه للاوراق المطلوبه ف الملف بالنسبه للمؤهلات

س1 : لو والدي / والدتي ملهمش مؤهل ( مش متعلمين) اعمل ايه ؟!

هتكتب لايكن وبس ومش لازم مؤهل طالما مفيش

س2 : طب لو هما معاهم مؤهل وكتبته ف الملف بس مجبتش المؤهل ودبسته؟!

هيرجعك تجيبه لان طالما كاتب المؤهل بتعهم يبقا لازم اثبات ع كدا

س3 : طب مؤهل والدي / والدتي ابتدائيه او اعداديه ؟!

هتروح الاداره التعليميه التابعه ليهم هطلع مستخرج رسمي وبيطلع وانت واقف

س4 : طب مهما طالبين مؤهل من متوسط وطالع وابتدائي واعدادي منخفض ؟!

هرد عليك واقلك بص ف اخر ورقه ف الملف ال هي بالازرق تقريبا ف ضهرها هتلاقي مكتوب المؤهل وتحتيه ابتدائي اعدادي دبلومات ... الخ

س5 : طب لو الاصل بتاع المؤهل معايا ومش عارف اطلع صوره طبق الاصل ومحتاج الاصل مش هينفع ادبسه اعمل ايه ؟!

بص اي ورقه ف الملف مطلوبه منك صوره طبق الاصل ومعاك الاصل ومش عارف تعتمده ( تختمه ) هتصور الاصل وتاخد الاصل والصوره معاك والضابط هيطلع ع الاصل وهياخد منك الصوره

س6 : طب لو المؤهل معهد او كليه اجيبه ازاي ؟!

بص غالبا المعهد او الكليه مؤهلاتهم والدك او والدتك لو بيشتغلوا بيقدموهم مع ورق الشغل اكيد هتلاقي الاصل ف شغله / شغلها هتصوره وتختمه عادي من شغلهم

او تروح لوزارة التعليم العالي التابع ليها المؤهل وتطلع مستخرج رسمي

س7 : طب ادبس الورق ولا اجيب صبغ كويس واستخدمه ؟!

متستعملش اي صبغ الورق كله يدبس ولو ف ورق ف نص الصفحه تدبسه بدباسه كبيره عشان توصل للمكان ال هتدبس فيه

بالنسبه للقيود ومشاكلها توضيح :

بينطلب منك 3 قيود ( قيد للوالد - قيد للجد من نحية الوالد - قيد للجد من نحية الوالده )

قيد الوالد لازم يكون مميكن ومن غير اخطاء ومينفعش تعزر ليه

قيد الجدين مميكن او ورقي عادي وينفع تعمل تعزر بس هيتقبل مرحله اولي اما الثانيه اتقبل السنه الفاتت عادي 

س1 : طب لو قيد الوالد ف مشكله وهما مش بيقبلو تعزر ليه اعمل ايه ؟!

بص هتروح تسلم ملفك من غيره عادي لكن هتمضي ع اقرار انك هتسلمه قبل الهيئه يعني تبدا ف تصحيحه ف اقرب وقت ممكن

س2 : طب لو عملت قيد الجدين ورقي او مميكن وفيها غلطات زي مثلا ( مذكرش عمي او خالي - ذكر عمي او خالي بس متوفي ووهو حي - ذكر عمي او خالي حي وهو متوفي ) اعمل ايه ؟!

حضرتك هتعمل تعزر وهتختمه من العباسيه وتبدا تشوف المشكله وتحلها لانك لازم تسلمه ورقي او مميكن ويكون صحيح ف المرحله التانيه ودا لمصلحتك

س3 : طب التعزر بيحتاج اي ورق عشان يطلع ؟!

لا انت / انتو هتروحو السجل هتشتروا ورقة التعزر ب جنيه وربع وبعد كدا تملوا الورقه وتختموها من نفس المكان

س4 : طب لو جدي مولود من قبل ال الستينات مثلا وطبعا ف الوقت دا البطايق كانت ورق والكلام دا وملهوش ورق اعمل ايه ؟!

الحاله دي بالذات لازم تعمل قيد ورقي مش مميكن

س5 : طب امته اعمل قيد ورقي وامته اعمل قيد مميكن وهل الورقي بينقبل ؟!

اولا : القيد الورقي دا بيتعمل ف حالات لو جدك مثلا ملهوش بيانات ع الكومبيوتر او احد عمامك او خلانك ف الحاله دي لازم ورقي لانه بيبقا كتابه وبيوضح كل حاجه

ثانيا : المميكن دا تعمله ف حاله واحده لو كل الاوراق المطلوبه لاستخراج القيد موجوده ومتسجله ع الكومبيوتر ومفهاش غلطات لان لو فيها الكومبيوتر هيطلعلك القيد ناقص

ثالثا : القيد الورقي بينقبل

بالنسبه للاوراق الاخري ال متذكرتش فوق

س1 : لو انا معايا شهادات رياضيه ع مستوي المحافظه او الجمهوريه ادبسها وهتفدني ولا لا ؟!

اه طبعا تدبسها وهتلاقي ليها ورقه لوحدها ف الملف وهتفيدك جدا جدا ويوم الاختبار الرياضي بعد ما تخلص الضابط هيقول مين ال واخد شهادات ف اي رياضه تقوله انا لانه هيعملك اختبار ع الرياضه بتعتك وهيديك درجات زياده وهيوضحها وهتفيدك ف قبولك ف الهيئه جدا وممكن تكون سبب ف دخولك الكليه

س2 : طب بالنسبه لو والدي / والدتي واحد فيهم متوفي اعمل ايه ف كارت الطولي بتاع الوالدين ؟!

هتصور والدتك / والدك ال ع قيد الحياه فيهم وهتدبسه

س3 : طب لو هما منفصلين اعمل ايه ؟!

هتصور كل واحد لوحده وهتكتب ع الصوره من ورا سبب الانفصال وتدبسهم

س4 : طب بالنسبه للمدخرات والاملاك اقدم الاصل ولا الصوره ؟!

هتقدم الصوره طبعا بس هتاخد الاصل معاك للاطلاع وتكتب ع ضهر الصوره اقر انا ... ان هذه الصوره طبق الاصل وهذا اقرار مني بذالك

س5 : طب لو بطاقة والدي / والدتي منتهيه اعمل ايه ؟!

تروح تطلع واحده مستعجل هتطلع ف يومين

س6 : طب بالنسبه للفيش بينطلب مرحله اولي ؟!

لا مش بينطلب ف المرحله دي بينطلب ف التانيه وتعمله وتاخده معاك وانت بتسلم ملف المرحله التانيه

س7 : طب بالنسبه للصور ال مطلوبه ف الملف احط الصور ال اتصورتها ف الملف ولا اتصور بره ؟!

طبعا هتدبس الصور ال اتصورتها ف الملف

س8 : طب الكارت الطولي ادبسه لوحده ولا بالصور ال ملزوقه فيه ؟!

هتشيل الصور ال ملزوقه فيه وتدبس الكارت لوحده

ملحوظه : الاوراق ال تدبس يا تكون الاصل يا تكون صوره معتمده يا تاخد معاك الاصل والصوره

ولو هتاخد الاصل للاطلاع والصوره تكتب ع ضهر الصوره اقرا ان..... ان هذه صوره طبق الاصلا وهذا اقرار مني بذالك

الاختام تكون واضحه ولازم تتاكد من كل الاوراق قبل ما تروح تسلم الملف
------------------------------------

بالنسبه للملف الالكتروني :

اولا : موقع الملف هتلاقيه موجود ف الملف الورقي او هتدخل ع موقع الكليه الحربيه هتلاقي ع الشمال مكتوب المنظومه الالكترونيه هتدخل عليها هيظهرلك مربعين كما هو بالشكل




هتدخل ع المربع ال ع اليمين ملكش دعوه بال ع الشمال

هتسجل بياناتك ويفضل تكون ف سيبر او ف مكان ف مطبعه عشان تطبعه

ملحوظه : حاول تملي الملف قبل ما تنوي انك تسلمه بيومين دا الافضل

لو ف اي مشكله معاك ومش عارف تسجل !
حاول تفتح من متصفح تاني او سجل تاني يوم

بالنسبه للاشخاص المتوفيين هتكتب اسمهم وف خانة السن صفر

- راجع بياناتك مره واتنين وتلاته قبل ما تطبع

بالنسبه ليوم تسليم الملف

س1 : رقم القيد هاخده امته ؟!

هتاخده ف اليوم دا بعد ما الظابط بيراجع الملف ويختم عليه ختم روجع هتروح تسلم ملفك ف شباك ع حسب تخصصك وهيلزقلك رقم القيد ع الملف وكرت التردد ال استلمته يوم سحب الملف

س2 : هختبر سمات ف اليوم دا ؟! وهتكون عباره عن ايه ؟ ووقت اد ايه ؟!

اه هتختبر سمات - هتكون عباره عن نماذج كل نموذج فيه 25 سؤال اسئله عامه وهندسيه وحسابيه اختياري و6 اسئله مقاليه مش اختياري - ف وقت ربع ساعه لكن هيجي بعد 6 او 8 دقايق وهيقلك سيب القلم وهيلم الورق

س3 : طب لو سبت اسئله محلتهاش هسقط ؟!

قولت وهقول تاني نجاحك ف السمات مش بيعتمد ع الاختبار ذات نفسه بيعتمد ع هيئة ملفك

س4 : طب اعرف ازاي النتيجه دي هتبان امته ؟!

الضابط هناك هيقلكوا بعد ما بتختبر او قبل

النتيجه هتبان يوم كذا فتركز زي ما ناس قالتلي مقلش وناس كانت معاهم ف نفس اليوم اكدولي انه قال فتركزو ف اليوم دا

س5 : طب المده ال بين الاختبار وظهور نتيجه السمات اد ايه ؟!

بتكون اسبوع

س6 : طب المده بين نتيجة السمات والطبي اد ايه ؟!

بتكون اسبوعين او اقل من اسبوعين

س7 : طب هعرف ازاي اني نجحت سمات ؟!

هيبعتولك رساله بالنجاح وال هيسقط احتمال كبير ميبعتلهوش ولو مبعتوش تتصل ع 16683 رقم الاستعلامات دا وهدخل رقم قيد وهيقلك ع النتيجه او من ع طريق الموقع

18 facebook

انا عندي ٢٠ سنه في ٣ ثانوي ليا تقديم فلكلية الحربيه ؟

هل للبنات انها تقدم في الشرطة او الحربية

ممكن حد يرد عليه انا الورق بتاعي ممكن يتاخر مش هعرف اسلموا في الميعاد بتاعه ممكن حد يرد عليه ويقولي هعمل ايه

لو سمحت انا عندي مشكله في الاسنان حاشي حشو عصب وخالع درس واللدغه في حرف ال (ر) بس مش بينه اووووي اطلع في الكشف الطبيبي ارجو الرد مهم جدا

انا مواليد1999ومش راضي يسجل علي النت

انا دور تاني ومجموعي بعد الدور التاني هيبقا 67,5اعمل ايه الرجاء الرد

هل الطالب ياخد صور شخصيه له معه وهو بيسحب ملف للشرطه ومن بوابه رقم كام يتوجه

طب بالنسبه للدور التاني اللي نتيجته هتطلع بعد معاد التقديم؟!

طب لو سمحت لو سجلت البيانات عالموقع الالكترونى وحصل خطا فى تسجيل مجموع الطالب وتمت الطباعة ايه الوضع ؟؟؟

طب لو انا استخدمت الكوركتر فيها ضرر ولا ايه

وازاي اطلع قيد ورقي

طب انا دبلوم تجاره و هما السنه دى فتحوها وبقالى سنتين متاخر هتقبل ولا لا

انا معايا دبلوم تجاره وعندي 29 ومتزوجة هل ينفع اقدم

في. تقديم للبنات شرطه

طيب النتيجة طلعت ثانوية عامة وعندي مواد تخلف هل ينفع التقديم والا لا

فين لينك التقديم بالظبط

لو سمحت انا اداب اجتماع ومش عارفه اقدم ازاي واعمل اييه ياريت حد يوجهني اعمل اييه محتاره واقدم امته وفين والورق المطلوب