كريكاتير التقديم - عن السؤال الغريب في كشف الهيئة انت عاوز تدخل الكلية دي لية



طبعا السؤال دا اغلب الناس بتجاوب عشان اخدم وطني وكدا لا كدا غلط لانه مش عاوزك تقول كدا هو عاوز الاجابة الي انت فعلا داخل عشانها مش الاجابة النموذجية

الاسئله الشامله بأجابتها للتقديم للضباط المتخصصين



بسم الله الرحمن الرحيم

الموضوع الشامل لجميع الاسئله من اول اعلان االتخصصات لغاية اختبار الهيئه


الموضوع عباره عن الاتي :


اولا : اسئله خاصه بمواعيد وسحب الملف


ثانيا : اسئله شامله لبيانات الملف وعن الاوراق المطلوبه ف الملف سواء مؤهلات او قيود ... الخ


ثالثا : اسئله وشرح وتوضيح ليوم سحب الملف


رابعا : توضيح وشرح للاختبار الطبي ذكور


خامسا : توضيح وشرح للاختبار الرياضي ذكور


سادسا : توضيح وشرح لاختبار النفسي ذكور واناث


سابعا : توضيح وشرح لاختبار الهيئه ذكور


------------------------------------------------------------------


س 1 - سحب الملفات امتي ؟
شهر 11 القادم لعام 2017

س 2 - وتقديم الملف ؟
بيكون بعدها ب 10 ايام حسب المطبوع علي الملف وينتهي بعد 20 يوم من البدء

س3- هل بيقبلوا معاهد او اكادميات او كليات خاصه ؟!

بالنسبه لحوار المعاهد... الخ ف كل سنه كانو بياخدو من معاهد لكن السنادي اختلفت عن قبليها ومش طالبين معاهد ولا اكادميات وبالنسبه للكليات الخاصه مش بيقبلوا الكل ف جامعات خاصه فقط بيقبلو منها والله اعلم


س4- الدخول من بوابه كام للذكور ؟ وللاناث ؟
- سحب وتسليم
اولا : بالنسبه للذكور بوابه 4
ثانيا : بالنسبه للاناث بوابه 3


س5- ممكن اخد الفون عادي معايا ؟!
اه ممكن تاخده بس هتسلمه ف الامانات مش هتدخل بيه


س6- ايه المطلوب لسحب الملف ؟! ولازم اكون حالق شعر ودقن ؟!
اولا : هتسحب الملف بالبطاقه فقط والملف ب 100 جندي
ثانيا : مش لازم بس الافضل تكون حالق لانك هتتصور والصور هتدبس ف الملف ( خفف ) وممكن لو لقي شعرك طويل او دقنك طويل هيتنك عليك ويقلك دا منظر واحد عاوز يعيش الحياه العسكريه


س7- ايه ال هيتم ف يوم سحب الملف ؟! ذكور واناث ؟
بالنسبه للذكور : هتروح بدري وتكون هناك الساعه 6 او 7 بالكتير عشان تنجز وتخلص بدري وتكون حالق وظابط حالك ولابس لبس كويس ومحترم وممكن تاخد الفون معاك عادي هتدخل من بوابه رقم اربعه هيشوف بطاقتك وانت داخل ع البوابه بعد كدا هتدخل هتقعد ع كراسي تخت مظله ع حسب تخصصك والضابط بيشرح الاعلان وبيقول ع التخصصات المطلوبه بحيث لو تخصصك مش مطلوب متسحبش وتخسر نفسك بعد كدا هتتوجه ع منافذ بيع الملف هتديله بطاقتك وال 100 ج وبعد كدا هتتوزن وهيقيس طولك بعد كدا هتروح تتصور وبعد ما تتصور هتدخل قاعه الضابط هيشرحلك ملئ الملف ف انت تكون مركز وتراجع ملفك ورقه ورقه عشان سعات بيكون ناقص ولو لقيت ورقه ناقصه هتلاقي ف عسكري قاعد هتاخد منه الورقه الناقصه بعد كدا هتستلم صورك ومع السلامه تروح
بالنسبه للاناث : زي ما حصل مع الشباب هيحصل معاكو لكن الاختلاف ف انك هتتصوري بشعرك وهتدخلي من بوابه رقم 3


س9- ف بيانات للثانوي ف الملف املاها ولا ؟!
لا متملاهاش سبها فاضيه تملي ال تبع الكليه ولو حد كتب فيهم حاجه عادي مش مشكله ولو عاوز تملاهم بردو
ودا من وجهة نظري والله اعلم يكون افضل وياه بقا لو تدبس شهادة الثانويه بس خليك ف المضمون وسبهم فاضين


س10- املي بيانات اخر ثلاث ورقات ؟!
اه تملاهم ما عدا ورقة مكتب التنسيق ال بالصفر ف اول الملف
- لو ف بيانات الاعمام الاخوال الخانات مش مكفيه اعمل ايه ؟!
هتجيب ورقه خارجيه وهتسطرها زي ال ف الملف وتكتب فيها الزياده وتدبسها ف الورقه ال ف الملف


س11- لو غلط ف حاجه ف الملف اعمل ايه مع انهم قايلين بلاش شطب ؟!
قدامك حلين :
الاول : لو الغلطه كبيره هتشيل الورقه دي من الملف وتروح تقلهم عندي ورقه ناقصه وتاخدها
الثاني : تاخد شرطه صغيره ع الغلط وتكتب الصح جنبها او فوقيها ومتقلقش


س12- بالنسبه للاتنين الشهود اجبهم منين ؟؟
اي اتنين موظفين ف اي مصلحه حكوميه ( مدرسه - معهد - كليه - اي اداره حكوميه) يمضوا والمدير يمضي ف خانة الشاهد التالت ويختم بختم شعار الجمهوريه
وتتاكد من انهم كتبوا ارقام بطايقهم


س13- بالنسبه لصفحه رقم 4 بند رقم 2 الخاص بالجواز مكتوب فيه الا يكون الطالب متجوز... الخ همضي ووالدي يمضي بردو ؟!
انت ملكش دعوه بالبند دا بمعني مش هيطبق عليك وعادي ينفع التقديم للمتزوجين وغيرك كتير مضي وكان متجوز واتقبل ودا خاص لثانوي بس لازم تمضي انت ووالدك


س14- لو والدي / والدتي احدهم متوفي اكتب ايه ف ورقة بيان حالة الوظيفه ؟!
بص اي حد متوفي سواء والدك او والدتك او اي حد قريبك بص ع الورق ال ف الملف الخاصه بيهم فوق وتحت لو لقيت جمله ( تملي البيانات ف حالة الوفاه ) يبقا تكتب وظيفته او مؤهله او اي حاجه مطلوبه منك قبل الوفاه


س15- لو والدي / والدتي بالمعاش اكتب ايه ؟!
زي موضحتلك ف السؤال ال قبل دا تبص فوق وتحت لو طالب منك تملي البيانات بتعته هتملاها من وظيفته ال كان فيها قبل ما يطلع ع المعاش مش من المعاشات
ولو مطلبش هتجيب سيرك بالمعاش بتاعه مختوم وتدبسه


س16- طب بالنسبه لختم المعاشات سعات مبيكونش واضح ؟!
حاول تعرف المكتوب ف الختم لان ممكن الظابط هناك لو شافه مش واضح هيقلك اقرا المكتوب ومتقلقش


س17- احسب سني ازاي ؟!
غير متاح لحين نزول الاعلان

س18- طب بالنسبه لسن الاقارب احسبه ازاي ؟!

غير متاح لحين نزول الاعلان

س19- طب انا معاد تسليمي عدي اعمل ايه او معاد تسليمي يوم كذا ومش هلحق اقدم ف المعاد ال مكتوب ع الملف ؟!
بص انت ليك تقدم ف اي يوم بعد المعاد المتحددلك ع الملف لكن مينفعش قبله


س20- طب ورقة حسن السير والسلوك اختمها منين ؟!
من كلية حضرتك وتاخد الملف معاك وانت رايح


س21- طب بالنسبه للتحريات هتبدا من امته ؟!
التحريات بتبدا من ساعة ما تسلم ملف المرحله التانيه وكورسات التعارف لان الكورسات دي بتتوزع
واحده للامن الوطني تقريبا وواحده للمدريه وواحده للقسم التابع ليهم الطالب ف محافظته


س22- طب انا لسه جيشي ف شهر واحد اكتب موقفي من التجنيد ايه ؟!
هتكتب مؤجل وهتجيب نموذج 110 وتاخده معاك


س23- طب انا ف الجيش اجيب ايه ؟!
هطلع بيان حاله من مركز تجنيدك

بالنسبه للاوراق المطلوبه ف الملف بالنسبه للمؤهلات
س24- لو والدي / والدتي ملهمش مؤهل ( مش متعلمين) اعمل ايه ؟!
هتكتب لايكن وبس ومش لازم مؤهل طالما مفيش


س25- طب لو هما معاهم مؤهل وكتبته ف الملف بس مجبتش المؤهل ودبسته؟!
هيرجعك تجيبه لان طالما كاتب المؤهل بتعهم يبقا لازم اثبات ع كدا


س26- طب مؤهل والدي / والدتي ابتدائيه او اعداديه ؟!
هتروح الاداره التعليميه التابعه ليهم هطلع مستخرج رسمي وبيطلع وانت واقف

س27- طب مهما طالبين مؤهل من متوسط وطالع وابتدائي واعدادي منخفض ؟!
هرد عليك واقلك بص ف اخر ورقه ف الملف ال هي بالازرق تقريبا ف ضهرها هتلاقي مكتوب المؤهل وتحتيه ابتدائي اعدادي دبلومات ... الخ


س28- طب لو الاصل بتاع المؤهل معايا ومش عارف اطلع صوره طبق الاصل ومحتاج الاصل مش هينفع ادبسه اعمل ايه ؟!
بص اي ورقه ف الملف مطلوبه منك صوره طبق الاصل ومعاك الاصل ومش عارف تعتمده ( تختمه ) هتصور الاصل وتاخد الاصل والصوره معاك والضابط هيطلع ع الاصل وهياخد منك الصوره


س29- طب لو المؤهل معهد او كليه اجيبه ازاي ؟!
بص غالبا المعهد او الكليه مؤهلاتهم والدك او والدتك لو بيشتغلوا بيقدموهم مع ورق الشغل اكيد هتلاقي الاصل ف شغله / شغلها هتصوره وتختمه عادي من شغلهم
او تروح لوزارة التعليم العالي التابع ليها المؤهل وتطلع مستخرج رسمي


س30- طب ادبس الورق ولا اجيب صبغ كويس واستخدمه ؟!
متستعملش اي صبغ الورق كله يدبس ولو ف ورق ف نص الصفحه تدبسه بدباسه كبيره عشان توصل للمكان ال هتدبس فيه

بالنسبه للقيود ومشاكلها توضيح :
بينطلب منك 3 قيود ( قيد للوالد - قيد للجد من نحية الوالد - قيد للجد من نحية الوالده )
قيد الوالد لازم يكون مميكن ومن غير اخطاء ومينفعش تعزر ليه
قيد الجدين مميكن او ورقي عادي وينفع تعمل تعزر بس هيتقبل مرحله اولي اما تانيه لا والتعزر لازم يتعمل من العباسيه

س31- طب لو قيد الوالد ف مشكله وهما مش بيقبلو تعزر ليه اعمل ايه ؟!
بص هتروح تسلم ملفك من غيره عادي لكن هتمضي ع اقرار انك هتسلمه قبل الهيئه يعني تبدا ف تصحيحه ف اقرب وقت ممكن


س32- طب لو عملت قيد الجدين ورقي او مميكن وفيها غلطات زي مثلا ( مذكرش عمي او خالي - ذكر عمي او خالي بس متوفي ووهو حي - ذكر عمي او خالي حي وهو متوفي ) اعمل ايه ؟!
حضرتك هتعمل تعزر وهتختمه من العباسيه وتبدا تشوف المشكله وتحلها لانك لازم تسلمه ورقي او مميكن ويكون صحيح ف المرحله التانيه ودا لمصلحتك


س33- طب التعزر بيحتاج اي ورق عشان يطلع ؟!
لا انت / انتي هتروحو السجل هتشتروا ورقة التعزر ب جنيه وربع وبعد كدا تملوا الورقه وتختموها من نفس المكان


س34- طب لو جدي مولود من قبل ال الستينات مثلا وطبعا ف الوقت دا البطايق كانت ورق والكلام دا وملهوش ورق اعمل ايه ؟!
الحاله دي بالذات لازم تعمل قيد ورقي مش مميكن


س35- طب امته اعمل قيد ورقي وامته اعمل قيد مميكن وهل الورقي بينقبل ؟!
اولا : القيد الورقي دا بيتعمل ف حالات لو جدك مثلا ملهوش بيانات ع الكومبيوتر او احد عمامك او خلانك ف الحاله دي لازم ورقي لانه بيبقا كتابه وبيوضح كل حاجه
ثانيا : المميكن دا تعمله ف حاله واحده لو كل الاوراق المطلوبه لاستخراج القيد موجوده ومتسجله ع الكومبيوتر ومفهاش غلطات لان لو فيها الكومبيوتر هيطلعلك القيد ناقص
ثالثا : القيد الورقي بينقبل


بالنسبه للاوراق الاخري ال متذكرتش فوق

س36- لو انا معايا شهادات رياضيه ع مستوي المحافظه او الجمهوريه ادبسها وهتفدني ولا لا ؟!

اه طبعا تدبسها وهتلاقي ليها ورقه لوحدها ف الملف وهتفيدك جدا جدا ويوم الاختبار الرياضي بعد ما تخلص الضابط هيقول مين ال واخد شهادات ف اي رياضه تقوله انا لانه هيعملك اختبار ع الرياضه بتعتك وهيديك درجات زياده وهيوضحها وهتفيدك ف قبولك ف الهيئه جدا وممكن تكون سبب ف دخولك الكليه


س37- طب بالنسبه لو والدي / والدتي واحد فيهم متوفي اعمل ايه ف كارت الطولي بتاع الوالدين ؟!

هتصور والدتك / والدك ال ع قيد الحياه فيهم وهتدبسه

طب لو هما منفصلين اعمل ايه ؟!

هتصور كل واحد لوحده وهتكتب ع الصوره من ورا سبب الانفصال وتدبسهم



س38- طب لو هما عايشين ومش منفصلين ؟!

هتصور الاتنين ف كارت واحد بخلفيه بيضه وتدبسه



س39- طب بالنسبه للمدخرات والاملاك اقدم الاصل ولا الصوره ؟!

هتقدم الصوره طبعا بس هتاخد الاصل معاك للاطلاع وتكتب ع ضهر الصوره اقر انا ... ان هذه الصوره طبق الاصل وهذا اقرار مني بذالك



س40- طب لازم اجيب اثبات قيد من النقابه ؟!

اه لازم لانهم رجعوا ناس كتير بسبب كدا


س41- طب لو بطاقة والدي / والدتي منتهيه اعمل ايه ؟!

تروح تطلع واحده مستعجل هتطلع ف يومين



س42- طب بالنسبه للفيش بينطلب مرحله اولي ؟!

لا مش بينطلب ف المرحله دي بينطلب ف التانيه وتعمله وتاخده معاك وانت بتسلم ملف المرحله التانيه



س43- طب بالنسبه للصور ال مطلوبه ف الملف احط الصور ال اتصورتها ف الملف ولا اتصور بره ؟!

طبعا هتدبس الصور ال اتصورتها ف الملف



س44- طب الكارت الطولي ادبسه لوحده ولا بالصور ال ملزوقه فيه ؟!

هتشيل الصور ال ملزوقه فيه وتدبس الكارت لوحده

ملحوظه : الاوراق ال تدبس يا تكون الاصل يا تكون صوره معتمده يا تاخد معاك الاصل والصوره

ولو هتاخد الاصل للاطلاع والصوره تكتب ع ضهر الصوره اقرا ان..... ان هذه صوره طبق الاصلا وهذا اقرار مني بذالك

الاختام تكون واضحه ولازم تتاكد من كل الاوراق قبل ما تروح تسلم الملف


------------------------------------

بالنسبه للملف الالكتروني : 👇

اولا : موقع الملف هتلاقيه موجود ف الملف الورقي او هتدخل ع موقع الكليه الحربيه هتلاقي ع الشمال مكتوب المنظومه الالكترونيه هتدخل عليها هيظهرلك مربعين كما هو بالشكل 👇






هتدخل ع المربع ال ع اليمين ملكش دعوه بال ع الشمال

هتسجل بياناتك ويفضل تكون ف سيبر او ف مكان ف مطبعه عشان تطبعه

ملحوظه : حاول تملي الملف قبل ما تنوي انك تسلمه بيومين دا الافضل


س45- لو ف اي مشكله معاك ومش عارف تسجل
حاول تفتح من متصفح تاني او سجل تاني يوم



س46- بالنسبه للاشخاص المتوفيين هتكتب اسمهم وف خانة السن صفر


- راجع بياناتك مره واتنين وتلاته قبل ما تطبع

-----------------------------------------------

بالنسبه ليوم تسليم الملف

س47- رقم القيد هاخده امته ؟!

هتاخده ف اليوم دا بعد ما الظابط بيراجع الملف ويختم عليه ختم روجع هتروح تسلم ملفك ف شباك ع حسب تخصصك وهيلزقلك رقم القيد ع الملف وكرت التردد ال استلمته يوم سحب الملف


س48- هختبر سمات ف اليوم دا ؟! وهتكون عباره عن ايه ؟ ووقت اد ايه ؟!

اه هتختبر سمات - هتكون عباره عن نماذج كل نموذج فيه 25 سؤال اسئله عامه وهندسيه وحسابيه اختياري و6 اسئله مقاليه مش اختياري - ف وقت ربع ساعه لكن هيجي بعد 6 او 8 دقايق وهيقلك سيب القلم وهيلم الورق


س49- طب لو سبت اسئله محلتهاش هسقط ؟!

قولت وهقول تاني نجاحك ف السمات مش بيعتمد ع الاختبار ذات نفسه بيعتمد ع هيئة ملفك


س50- طب اعرف ازاي النتيجه دي هتبان امته ؟!

الضابط هناك هيقلكوا بعد ما بتختبر او قبل

النتيجه هتبان يوم كذا فتركز زي ما ناس قالتلي مقلش وناس كانت معاهم ف نفس اليوم اكدولي انه قال فتركزو ف اليوم دا


س51- طب المده ال بين الاختبار وظهور نتيجه السمات اد ايه ؟!

بتكون اسبوع


س52- طب المده بين نتيجة السمات والطبي اد ايه ؟!

بتكون اسبوعين او اقل من اسبوعين


س53- طب هعرف ازاي اني نجحت سمات ؟!

هيبعتولك رساله بالنجاح وال هيسقط احتمال كبير ميبعتلهوش ولو مبعتوش تتصل ع 16683 رقم الاستعلامات دا وهدخل رقم قيد وهيقلك ع النتيجه او من ع طريق الموقع

-----------------------------------

بالنسبه لاسئلة الطبي 

 
مش هسئل واجاوب انا هشرح واوضح شوية حجات باختصار وكلها للشباب اما الاناث هبقا اخلي ادمن بنت معانا تنزلكو ال بيحصل ف الطبي بالتفصيل الممل ع جروب الاناث مش هنا كمان
اليوم دا لازم يكون معاك فيه كرت التردد وبطاقتك وبقية الصور ال اتصورتها يوم سحب الملف وتاخد فلوس معاك عشان لو قدر الله ونزلت ف كشف تعمل التماس وبيتعمل بفلوس تقريبا 25 ج
ويكون معاك او لابس سلب ابيض سبعه لازم سلب وابيض ويكون سبعه مش تجبلي واحد الوان وتلبسه انت راجل

س54- يوم الطبي للبنات والشباب كل جنس هيكون ليه ايام خاص ليه لوحده يعني البنات هتكشف ف ايام غير ايام الشباب مش كله مع بعضه مش بظرميطه هي


55- ف اليوم دا لازم تكون متعاون مع الدكاتره وبالاخص بتاع الجراحه


56- بالنسبه للطول والوزن اهم حاجه ف الطول والوزن ان جسمك يكون متناسق رياضي يعني بغض النظر وزنك ناقص او زايد لان لو ناقص جامد او زايد جامد هيعرضك ع مستشار ف وقتها المستشار دا بييشوف هيئة جسمك متناسق ولا


57- بالنسبه لحب الشباب يا شبب لو بنسبه كبيره ممكن يأثر وبتبقا ع حسب الدكتور ال هيكشف عليك


58- بالنسبه لعياده السنان الكشف دا سهل جدا ومش بيدققو فيه بمعني لو ف ضرس او سنه مش موجوده وكدا لو دكتور كويس هيخليك تقول ( امر امير الامراء بحفر بئر ف الصحراء ) عشان يشوف هل الضرس او السنه دي مأثره ع مخارج الحروف الدغ يعني ولا لا


59- بالنسبه للعظام هتتشقلب وهتعمل واحد امبليه وهيفليك من فوق لتحت ودا من اصعب الكشوفات


60- بالنسبه لكشف القلب ف الدكتور هيكشف ع نبض قلبك وكدا فلازم يكون قلبك ميت اوعي تتوتر ف الكشف دا اامسك نفسك وجمد قلبك


61- بالنسبه للجراحه  : كشف عادي جدا بيتم فيه الكشف عن عمليات البواسير وكدا سيبك من الي بتسمعه


62- بالنسبه للباطنه هيقعدك ع جهاز وهيحط ع بطنك حاجه زي الجل كدا مش جل شعر  لا بس مش عارف ايه هو وبعد كدا هيمشي بحاجه عامله زي الفاره ع بطنك يشوف كل حاحه سليمه ولا اظن الدكاتره ال بيقدمو عارفينه

ونتيجه الطبي هتعرفها ف اخر اليوم


---------------------------------------------
63 -
بالنسبه للاختبار الرياضي

الاختبار دا بيكون بعد الطبي بيومين او بيوم
هشرح وهوضح فيه الحجات المهمه باختصار والاختبار دا ليه لينك لوحده ف البوست المثبت ف الجروب او ع المدونه هنا
ف اليوم دا هتاخد معاك كرت التردد والبطاقه وبقية الصور ال فاضله من الصور ال اتصورتها ف الملف لانك هتحتاجها

مش لازم تكون بتعرف تعوم وبالنسبه للقفزه بتكون ع ارتفاع 7ونص متر وبيبقا ف غواصين تحت وتقريبا ممكن تكون اول اختبار او ممكن تكون بعد الجري لان دي اهم حاجه ف اليوم دا نجاحك ف الرياضي واقف عليها متخليش الشيطان يخزوقك قول اعوذ بالله من الشيطان الرجيم ونط يا وحش
اليوم دا عباره عن تجميع درجات ولازم تبذل اقصي طاقتك ف اليوم دا لانه مهم جدا وبالنسبه للضباط الاحتياط ال بيقدموا لازم تجيب درجه كويسه عشان متتبهدلش من مدير الكليه ف الهيئه

النجاح فيه تقريبا يا من 80 من 200 يا 100 من 200

بس متحطش ف بالك النجاح بس نصيحه مني ليكوا اقتل نفسك ف اليوم دا 💂💂


------------------------

64- بالنسبه للنفسي

بيبقا عباره عن اسئله بتحلها ع كومبيوتر

اسئله عامه واسئله شخصيه وف اليوم دا قبل متختبر بتدخل قاعه بيتحددلك فيها معاد الهيئه

الهدف من الاختبار

بيحدد فيه شخصيتك ع اجهزه كمبيوتر اسئله بقي لا تعد ولا تحصي من هنا للصبح وخلى بالك فى اسئله تحديد ذكاء كتيير جدا وفى الوقت دا هاتحس فعلا بمعدل ذكائك وهل انت ذكى ولا غبي والاختبار دا مهم جدا على فكره وبيكون ليه عامل اساسي فى اختيارك

ولو فى حاجه مش فاهمها اسئل عنها لان لو فى حاجه مش فاهمها ممكن بسببها تضيع كل الاسئله


------------------------

65- بالنسبه للهيئه

- هتلبس بدله نضيفه وكرفته كويسه وملمع جزمتك وبكل هدوء بتدخل الهيئه فى هيئه خطوه معتاده

ادرب عليها حتى ولو انت مش ظابط او عسكري هايدل ع اهتمامك ومنظرك بيكون احلى

- بتقول 7 حاجات ع ما اتذكر

اسمك - رقم قيدك - جامعتك - كليتك - تخصصك - تقديرك - درجتك فى الرياضي

- وانت فى الاختبار بيبصولك وبيبوصو للملف بتاعك ع شاشات اسكرين قدامهم ممكن يسألك عن حاجه وممكن يقولك اتفضل

- ممكن تلاقى اسئله غريبه وحصلت زى مثلا اذكر مدن شمال سينا او مساحتها وممكن تلاقى اسئله شخصيه وانت لازم تكون بتتزن بالهدووء التام وتكون جاد فى كلامك ولو حد هزر معاك اخرك ابتسامه خفيفه وبلاش ابتسامه احسن

ماتعلقش ع الهزار او ترد بنكته ويكون كلامك فيها اتزان

(حضرتك وافندم -وتمام يافندم ) الكلمات الرسميه


=========================

وبكدا خلصت ... بالتوفيق للجميع
سعداء بخدمة حضراتكم

كريكاتير التقديم - ومعاناه الطلبة في كشف الهيئة ومحاولة ايجاد اجابة ل انت عاوز تدخل الكلية دي لية


للتوضيح الموضوع مش صعب زي ما بيظهور في كلام الناس فقط محتاج ثقة في النفس وخليك بعيد ديما عن الاجابة بي عاوز اخدم وطني لانه هيقابلك بسؤال تاني ويقولك ماهو المهندس برضو والدكتور بيخدم وطنة خلي اجابتك تكون بتعبر عن احساسك تجاة الكلية وتكون واثق من كلامك

كريكاتير التقديم - عن صاحبك الرخم الي لما تسالة عن اختبارات الحربية يرد عليك بكشف الجراحة


للتوضيح كشف الجراحة كشف عادي جدا للكشف فقط للكشف علي عمليات البواسير وما الي ذلك ليس كما يعتقد البعض ويزيدون الموقف حسب مزاحهم

كريكاتير التقديم - افرح في صمت فهناك من يتالم لضياع حلمه


هناك اشخاص عندما تاتيم رسالة القبول كانهم ملكو العالم ولا يعلم ان هناك الكثيرون ممن ضاع حلمهم في نفس الوقت حتي انه لا يبالي لهم فلما لا نفرح في صمت كي لا نزيد هم الاخرين 

نصائح التقديم - العسكرية ليست مظهر بدون عناء داخلي



العسكرية هي واحدة من امر التجارب التي قد تمر علي الانسان ,, لما فيها من كبت للتعبير عن الذات وتكبيل للهوى الشخصي فكل حركة لا تكون الا بأمر ، وغيرها الكثير 

لكن امر وحيد قد يخرجك من كل هذا ، وهو لو انك اخذت الامور ببساطة وتمتعت بأرتداء ذلك الزي بفخر
كونك احد ابطال القوات المسلحة الذين يخدمون الوطن ويفدونه بكل ما يملكون فلا تحاول ان تقنع نفسك ان الحياة العسكرية ليست صعبة ويمكن تحملها اذا لم تكن مؤهل لها فلا تحاول فهناك الكثيرون يقدمون الاستقال بعد الدخول كونهم غير مؤهلين لذلك او وجدوا وسائط للدخول واخد مكان من يستحق

نصائح مهمه قبل الكشف الطبى فى الكليه الحربيه





  1. - تجنب الحصول على أي دواء قد يغير من صفتك الطبية أو نتائج التحاليل.
  2. - يجب الإفصاح عن الأمراض أو العمليات الجراحية التي أجريتها في أي مرحلة من حياتك قبل الكشف الطبي عليك و ذلك خلال عرضك على اللجنة الطبية المختصة.
  3. - تأكد من نظافة الأذن و غسلها قبل توقيع الكشف الطبي عليك.
  4. - تأكد من تخفيف شعر الرأس و حلاقة شعر الإبط و العانة بالكامل.
  5. - احصل على قسط كافي من النوم و الراحة قبل ذهابك للكشف و تجنب الإرهاق و السهر ليلة الكشف حتى لا تتأثر حالتك الصحية بذلك.
  6. - الطلبة الذين يحق لهم الكشف بالنظارة الطبية هم الطلبة الحاصلين على مجموع 90 % علمي رياضة فأعلى لصالح الكلية الفنية العسكرية فقـــــــــــــــــط.
  7. - لا يعتد بأي كشوفات أو تحاليل أو تقارير طبية بخلاف ما يصدر من المجلس الطبي لطلبة الكليات و المعاهد العسكرية.

اعلان فتح التقديم للضباط المتخصصين للكليه الحربيه ( الشروط والتخصصات ) 2017





بسم الله الرحمن الرحيم

الإعلان عن قبول دفعة جديدة من خريجى الجامعات بالكلية الحربية ...
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
صدق الفريق أول / صدقى صبحى القائد العام للقوات المسلحة وزير الدفاع والإنتاج الحربى على الإعلان عن قبول دفعة جديدة من خريجى الجامعات بالكلية الحربية دفعة يناير 2017 والتى تشمل الدفعات
  1.  (110) أطباء 
  2.  (75) مهندسين 
  3. (63) مختلط الدفعة (105) رئيسات تمريض ،

جاء ذلك خلال وقائع المؤتمر الصحفى الذى عقده اللواء أ ح / جمال أبو إسماعيل مدير الكلية الحربية مدير مكتب تنسيق الكليات والمعـاهد العسكـرية للإعلان عن شروط القبول .


وأشار مدير الكلية الحربية أن 
 
التخصصـات من الأطباء ورئيسات تمريض

تخصصات طب بشرى ذكور الحاصلين على درجات " البكالوريوس / الماجستير / الدكتوراه " ويمكن للأطباء البشريين الحاصلين على درجة الماجستير والدكتوراه الترشيح للعمل كأعضاء هيئة تدريس بكلية الطب للقوات المسلحة على أن يكونوا من التخصصات "الميكرو بيولوجى / النساء / التشريح / الباثولوجيا / الكيمياء الحيوية / الفارماكولوجى / الباطنة / الجراحة / الصحة العامة وطب المجتمع / الأطفال " ، وبالنسبة لرئيسات التمريض إناث الحاصلات على درجة البكالوريوس ، والصيادلة ذكور / إناث الحاصلين والحاصلات على درجة البكالوريوس ، وطب أسنان ذكور الحاصلين على درجات " البكالوريوس / الماجستير / الدكتوراه "
ويشترط لدفعة الأطباء أن يكون
المتقدم قد أمضى فترة الإمتياز وأن يكون حاصلاً على تقدير جيـد فأعلـى للأطباء البشريين والأسنان ومقبول فأعلى بالنسبة للصيادلة والبيطرى والتمريض إناث ، على أن يكون المتقدم حاصلاً على المؤهل عام 2016 والسنوات السابقة له على أن لا يزيد سن المتقدم فى الأول من يناير2017 بالنسبة للأطباء البشريين الحاصلين على درجة البكالوريوس عن (30) سنة ، والحاصلين على درجة الماجستير عن (34) سنة والحاصلين على درجة الدكتوراه عن (38) سنة ، وبالنسبة للأطباء البيطريين الحاصلين على درجة البكالوريوس لايزيد السن عن (28) عام ، و(26) عام لخريجات كليات التمريض للإناث.



أما بالنسبة للدفعة (75) مهندسين

فتشمل تخصصات هندسة بحرية ( بناء سفن ) وهندسة مدنى والهندسة الكميائية والحواسب وميكانيكا إنتاج وميكانيكا سيارات وكهرباء قوى وإتصالات / إلكترونيات وميكانيكا قوى وهندسة طيران وهندسة عمارة
ويشترط أن يكون
المتقدم من الذكور فقط الحاصلين على المؤهل عام 2016 وما قبلها على أن لا يزيد السن فى الأول من يناير 2017 عن (26) سنة بتقدير مقبول فأعلى على أن يتم المفاضلة بين المتقدمين على أساس الدرجة العلمية أولا ثم درجات النجاح فى باقى إختبارات القبول .


أما بالنسبة للتخصصات الأخرى

المطلوبة من خريجى الجامعات المصرية من الإناث
فتشمل العلاج الطبيعى وأداب علم النفس وأداب علم الإجتماع ويفضل أن تكون الإناث من الضابطات المكلفات بالقوات المسلحة .


وكذلك من خريجى الجامعات المصرية من الذكور فقط
فى تخصصات التجارة (محاسبة) وعلوم الحواسب وتكنولوجيا المعلومات وعلوم ميكروبولوجى وكمياء تحليلية ومزدوجة وعلوم حيوان وعلوم الجولوجيا والبيولوجى وعلوم فيزياء وكيمياء حيوية وكيمياء خاصة ، واللغات إنجليزى وألمانى وتركى وإيطالى وفرنسى وروسى وأسبانى وعبرى ويونانى وصينى وكورى وفارسى ويابانى وأداب علم نفس وأداب إجتماع وتربية رياضية والإعلام والصحافة والزراعة والعلاج الطبيعى والحقوق ،
على أن يكون المتقدمين من الذكور الحاصلين على المؤهل عن عام 2016م والسنة السابقة لها فقط بتقدير جيد فأعلى على أن لا يزيد السن فى الأول من يناير 2016 عن (26) سنة ، ويسمح لتخصص الكيمياء التحليلية الحاصلين على الماجيستير على ألا يزيد السن عن (34) سنة ، وبالنسبة لتخصص العلاج الطبيعى فيسمح للحاصلين والحاصلات على المؤهل لعام 2014 التقدم لهذه الدفعة على أن يكون / تكون قد أمضوا فترة الإمتياز .


علما بأنه سيتم قبول الطلبة بالدرجة العلمية المطلوبة ومعاملتهم وتعيينهم بعد التخرج بنفس الدرجة حتى فى حالة حصول الطالب على درجة علمية أعلى ، حيث تقبل جميع التخصصات بدرجة علمية البكالوريوس / الليسانس عدا تخصصات الطب البشرى / طب الأسنان فيسمح قبول الطالب بدرجة علمية أعلى "الماجستير / الدكتوراه " وفى تخصص الكيمياء التحليلية من الحاصلين على درجة الماجستير شرط إحضار ما يفيد ذلك أثناء تقديم الأوراق .



وعن الشروط العامة للقبول

فيشترط فى جميع المتقدمين أن يكون الطالب مصرى الجنسية ومن أبوين وجدين مصريين ، وألا يكون الطالب أو أبويه مكتسبين جنسيات أخرى أو متقدم أحد منهم للحصول عى جنسية أجنبية ، وألا يكون المتقدم قد سبق الحكم عليه بعقوبة جنائية أو فى جريمة مخلة بالشرف ، وأن يكون حسن السير والسلوك ، وألا يكون قد إستقال أو فصل تأديبياً من أى كلية أو معهد عسكرى أو مدرسة عسكرية ، وأن لا يكون قد أعفى من الخدمة العسكرية لعدم اللياقة الطبية ، على أن يتم إرفاق بيان المعاملة التجنيدية ، وأن يجتاز جميع الإختبارات والفحوصات الطبية والبدنية التى يحددها مكتب تنسيق القبول وفقاً للمستويات المقررة ، وأن يجتاز إختبار قفزة الثقة فى حمام السباحة من إرتفاع (7,5) متر بدون تردد وللمرة الأولى , ولايجوز إعادة الكشف على الطالب فى نفس الدفعة المتقدم لها فى حالة عدم اللياقة الطبية ، ألا يقل الطول عن 170 سم للذكور و155 سم للإناث ويسمح للضباط الإحتياط والمكلفين وأفراد القوات المسلحة الموجودين بالخدمة بالتقدم لهذه الدفعة بنفس الشروط .


علما بأن مدة الدراسة تستمر لمدة ستة أشهر بالكلية الحربية لجميع التخصصات ، وسيتم فتح باب سحب ملفات القبول من المكتب الرئيسى بالكلية الحربية بمصر الجديدة إعتبارا من يوم الأربعاء الموافق 7/ 12 /2016



وللشرح أكتر تابعنا على صفحه التقديم لـ كليه الشرطه - الكليه الحربيه

ولأى سؤال عندك انضم لجروب الضباط المتخصصين لـ الكليه الحربيه - كليه الشرطه

وأى جديد هانتابع معاكوا ان شاء الله وبالتوفيق للكل يارجاله

كاريكاتير التقديم - عن معاناة الطالب في كشف الهيئة


الطالب بيكون داخل كشف الهئية فاكر كل حاجه ومذاكر وحافظ ومضبط نفسه لكن ساعه ما بيدخل من الباب ويطلع علي المنصه بيكون زي الصفحة البيضاء هههههههه خليك قوي وركز بالذات في كشف الهئية لانهم بيلعبو علي كدا بالذات

الكلية الحربية - الاوراق المطلوبة لتقديم ملف البيانات


 


الاوراق المطلوبة فى ملف المرحلة الاولى الملف الازرق :-

  1. حسن السير والسلوك ودى بتعملها داخل الملف فى مدرستك او الجامعة صفحة 6
  2. وجه وظهر صورة بطاقتك الشخصية كل واحدة لوحديها صفحة 8
  3. شهادة المؤهل او بيان الدرجات صفحة 10
  4. شهادة ميلاد كمبيوتر اصل للطالب صفحة 10
  5. صورة من الشهادات الرياضية او التفوق الرياضى ان وجد وتكون مختومة صفحة 11
  6. فى حالة قيد الطالب فى كلية او معهد يتم تثبيت اصل القيد مختوم فى صفحة 12
  7. القيد العائلى للوالد صفحة 14
  8. صورة معتمدة من قرار الوصاية وصورة من بطاقة الواصى \ولى الامر فى حااااالة وفاة الواااالد فقط
  9. وجه وظهر صورة البطاقة الشخصية للوالد كل واحدة لوحديها صفحة 16
  10. صورة معتمدة من مؤهل الوالد او بيان درجات المؤهل للوالد صفحة 1
  11. صورة وجه وظهر البطاقة الشخصية للوالدة كل واحدة لوحديها صفحة 18
  12. صورة للوالدين كارت طولى الاتنين بجوار بعض بالطو وفى حالة سفر الاب يصور كل واحد لوحد ويضعوا جنب بعض مع كتابة السبب خلف الصورة ان الوالد بالخارج وايضا فى حالة الطلاق او الانفصال ويكتب بسبب الانفصال صفحة 18
  13. صورة معتمدة من مؤهل الوالدة اوبيان درجات المؤهل للوالدة صفحة 20
  14. صورة من مستندات الاملاك\المدخرات\الاسهم الرئيسية للوالد التى سبق ذكرهافى صفحة 13 فى بيانات الوالد.. صفحة 21
  15. صورة من مستندات الاملاك\المدخرات\الاسهم الرئيسية للوالدة التى سبق ذكرهافى صفحة 17 فى بيانات الوالدة.. صفحة 22


وبهذا نكون قد انهينا جميع الاوراق المطلوبة للملف الازرق للمرحلة الاولى

تنببببيه هااااااااام :-

عند شرائك للملف تاكد من انك سجلت بياناتك على الكمبيوتر

وقبل ذهاب تاكد من وجود البطاقة معك.

الكلية الحربية - شرح بالتفصيل الاختبار الطبي لمتخصصين اناث



كشف الطبي متخصصين حربيه اناث

اولا : الدخول بيكون الساعة 6 صباحا من باب 6 ودا باب صغير كدا ومش باين ودا اسمه باب البنات

ثانيا : يفضل انكوا تسيبوا الموبايلات مع الاهل برا عشان مفيش حد موبايله يضيع او يتأخر وهو بيسلمه وعشان هما جوا بيتنرفزوا عشان الموبايلات

ثالثا : محدش يتكلم كتير وتنفذوا الاوامر من اول مرة يقولوا فيها الامر

تفاصيل الكشف
-----------------------------
اول لما ندخل ونقعد في الاماكن المخصصة هندخل غرفة الحاسب الالي عشان نعمل البصمة وتسجيل دخول اختبارات الكلية

بعد البصمة ببنزل غرفة خلع الملابس ونقلع الهدوم كلها ما عدا الاندر وهنلبس الجاون ( روب العمليات ) واوفر شوز ( اكياس بلاستيك يعني ) وبتلبسوا كذا واحد عشان السقعة وعشان لو اتقطع يكون معاكوا بديل

ممكن يسمحوا بلبس الجاكيت وممكن لا بس ممنوع الحجاب في الكشف الطبي

الكشف بالترتيب
----------------------------
أشعة :
--------
وطبعا لو في اي معدن معاكي بتخلعيه وانتي كدا كدا مش لابسة البرا خالص لانك قلعتيها في غرفة خلع الملابس
طبعا لو في دبلة بتخلعيها ولو في سلسلة بتخلعيها ولو في حلق بردو بتخلعيه ويفضل انك تيجي من غيرهم

بعد كدا كشف قوام :
--------------------
اللي هو طول ووزن

بعد كدا رمد :
------------------
بتشوفي العلامات مفتوحة فين
بعده نفسية ودي بقى ممكن يقولك 66 44 وممكن يسألك اي سؤال عادي

بعده اسنان :
----------------
مبتكلمش على التسوس خالص بس بيتكلم عن شكل الاسنان الخارجي ولازم تكون نضيفة ومفيهاش جير
بعده انف واذن ولازاااااااااااااااااااااااااااام تغسلي ودانك من الشمع

بعده جلدية وجراحة :
----------------------
بيكونوا في اوضة واحدة والكلام اللي الدكتور يقوله لازم يتنفذ وممنوع اعتراض ولو مش عاجبك الكلام اعتذري عن الكشف واتفضلي روحي البيت وممنوع الضحك نهائي مع اي دكتور ( دي كانت تعليمات القائد ) ولو الدكتور هزر معاكي اكتفي بابتسامة خفيفة

بعد كدا باطنة :
-------------------
ودي هتكشفي بالسماعة عادي على بطنك

بعد كدا عظام :
-----------------
هيطلب حركات خفيفة جدا زي اتربعي و اركعي وافردي ايدك وافردي رجلك ع الارض وقرفصي

بعد كدا موجات صوتية :
--------------------------
ودا سونار

بعد كدا قاع عين :
----------------------
بيشوف نسبة الضعف على جهاز وبيحط قطرة بتوسع البؤبؤ

بعد كدا رسم قلب :
----------------------
وهدي نفسك خالص عشان يطلع سليم

بعد كدا قلب :
--------------------
واهدي خالص عشان ضربات القلب متكونش سريعة ويطلعك

بعد كدا المعمل :
---------------------
بيسحب منك عينة دم وبول
--------------------------------------
كدا الكشف الطبي خلص
بترجعو الاستراحة تاني وينادوا على اسماء البنات اللي عندها استشارة ويخلصوا الاستشارة وترجعوا تاني اماكنكم وينادوا على الناس اللي مش هيكملوا عشان يروحوا

البنات اللي مسمعوش اسماءهم هيدخلوا رياضي ان شاء الله

لازم لازم لازم تكوني صايمة ع الاقل 6 ساعات
صيام عن الاكل والعصير
مسموح بشرب الماء بس 
ملحوظة:
اي توضيح غير مسموح بيه ( معلومة من ظابط هناك وكان التحذير شديد)

الكلية الحربية - تفاصيل الكشف النفسي والهيئة ومعلومات عن مصر والعرض العام للمتخصصين



الاختبار النفسي
---------------------------------------
تقعد على الكومبيوتر بتجاوب حوالى 270 سؤال مختلف اختر فى زمن محدد والزمن بيبقى فوق فى الصفحه العداد شغال ولازم متاخدش فى قراءة وحل السؤال اكتر من 10 ثوانى والى مش هتلح تحل حاجه خالص ومتخفش لان الاسئلة دى بتبقى عن شخصيتك ومواقف مختلفة بيشوفوا رد فعلك ايه وحاول تكون مركز لان السؤال بيتكرر بكذا طريقة
وبيتم تحديد فيه شخصيتك ع اجهزه كمبيوتر اسئله بقي لا تعد ولا تحصي من هنا للصبح وخلى بالك فى اسئله تحديد ذكاء كتيير جدا وفى الوقت دا هاتحس فعلا بمعدل ذكائك وهل انت ذكى ولا غبي والاختبار دا مهم جدا على فكره وبيكون ليه عامل اساسي فى اختيارك
ولو فى حاجه مش فاهمها اسئل عنها لان لو فى حاجه مش فاهمها ممكن بسببها تضيع كل الاسئله ودي
حصلت مع دفعه كامله كانت بتختبر
كدا كدا قليل منكم اللى هاتلاقوه ماجلوش رساله انه يكمل بقيت الاختبارات لان اساسا الاختبار دا عباره عن درجه بتاخدها وبتكمل

------------------------------
اختبار الهيئه  😬
-------------
اولا : 

إحضر في يوم الأختبار الساعة السابعة صباحاً ولا يُسمح بالتخلف أو التأجيل .

ثانيا :

الإختبار الشخصي يهدف إلى إنتقاء أفضل العناصر التي تلتحق بالقوات المسلحة والتي تتوفر فيها :
  1. السمات الشخصية والنفسية المناسبة.
  2. اللياقة الطبية والبدنية التي تؤهل الطالب للنجاح في عمله .
  3. قوة الشخصية والقدرة على التصرف .
  4. المعلومات العامة والثقافية.
  5. الرغبة الأكيدة للطالب للإلتحاق بالكليات العسكرية .

ثالثا : 

يتم الأختبار وفقاً للشروط واللوائح والقوانين المنظمة وطبقاً لإحتياجات القوات المسلحة في الأفرع الرئيسية المختلفة .

رابعا :

تذكر أنك تتقدم لمجلس مديري الكليات والمعاهد العسكرية لأختيارك من ضمن آلاف
المتقدميين فحافظ على مظهرك وأرتدي الزي المحدد بالطريقة المناسبة .

خامسا:

سوف يتم توجيه بعض الاسئله التعجزيه اليك و عليك ان لا تترد و تجيب فى ما بين من 3---7 ثوانى تقريبا.
بعض الاسئله لاكن ربما لا تكون موجودة مجرد اقتراحات او اراء اشخاص حضرو الاختبار:
  1. قدامك طبق رز فيه كام جبيه رز؟
  2. يرسملك سلم على الحيطه و يقلك اطلع السلم ده.
  3. هيحط سجاده كبيره اودام باب غرفته و يؤللك تعالى من غير ما تدوس على السجاده؟
  4. كم عدد ايات القران الكريم؟
من وجة نظر شخصية مفيش حاجه من دي بتحصل خالص ممكن اسالة عامة او اسالة عن العائلة فقط

الهدف من هذه الاسئله كشف رد فعلك وسرعه استجابتك للرد على الاسئله
المطلوب منك :
------------------
تكون محضر بدله نضيفه وكرفته كويسه وملمع جزمتك وبكل هدوء بتدخل الهيئه فى هيئه خطوه معتاده
ادرب عليها حتى ولو انت مش ظابط او عسكري هايدل ع اهتمامك ومنظرك بيكون احلى
بتقول 6 حاجات ع ما اتذكر
(( اسمك - جامعتك - كليتك - تخصصك - تقديرك - درجتك فى الرياضي ))
وانت فى الاختبار بيبصولك وبيبوصه للملف بتاعك ع شاشات اسكرين قدامهم ممكن يسألك عن حاجه وممكن يقولك اتفضل
ممكن تلاقى اسئله غريبه وحصلت زى مثلا اذكر مدن شمال سينا او مساحتها وممكن تلاقى اسئله شخصيه وانت لازم تكون بتتزن بالهدووء التام وتكون جاد فى كلامك ولو حد هزر معاك اخرك ابتسامه خفيفه وبلاش ابتسامه احسن
ماتعلقش ع الهزار او ترد بنكته ويكون كلامك فيها اتزان
(حضرتك وافندم -وتمام يافندم )الكلمات الرسميه او عندنا ماتسمى بالكلمات الميرى

----------------------------------------------
معلومات عن مصر
--------------------------------------------------

فى مدرج كبيير جدا تقريبا بيكون فيه العدد كله او ع مرحلتين وراء بعض بتاخد التعليمات وتبدأ تختبر زي السمات بس المره دي الاختبار هايفرق معاك فانا انصح انك تطبع ملف معلومات عن مصر وتذاكره هياخد منك يوم ونص ومعلومات تقريبا انت عارفها .هاتدخل الامتحان هاتحله كله بالكامل صح وهاتكون متأكد من حلك
دا اللى انا كنت عملته وخلى بالك مع مذاكرتك دي وانك بتعرف الاجابه من قبل ماتقرأ السؤال ان وقت الاجابه مش هاتكفيك فحاول انك تكون سريع بس سرعتك ما تأثرش ع تركيزك

----------------------------------------------
   عرض عام
----------------------------------------------------

بيبقي عباره عن تحاليل طبيه متقدمه فقط لا غير بتعملها وانت لابس هدومك كامله وبتروح على طول وبتنتظر نتيجه قبولك ام لا تقريبا هم بيقولولك انها هاتجيلك بعد 10 ايام لكن هى فى الحقيقه هاتجيلك خلال 25 يوم

سعداء بخدمة حضرتكم

الكلية الحربية - تفاصيل الكشف الطبي للضباط المتخصصين

 
 
الكشف الطبي للضباط المتخصصين
-------------------------------------------
 دلوقتي حضرتك عديت في كشف السمات الحمد لله ودلوقتي الكشف الطبي اولا الطبي يومين متتابعين كالاتي
المطلوب قبل الكشف
  1. حلق شعر الراس علي الدرجة 1 او 2
  2. غسل الاذن وتلميع الاسنان 
  3. شراء سلب ابيض سبعة للبسة وقت الكشف
-----------------
 اليوم الاول
-----------------
  1. عياده التناسق . بتدخل علي ميزان اليكتروني بتقيس وزنك وطولك مع بعض وخلي وزنك مثالي يعني اطرح من الطول 100وده الوزن المثالي
  2. عياده النفسيه . ودي عباره عن كشف مخارج الحروف واللدغ ودي من العيادات السهله والضابط هيخليك تقول مثلا 44 او 666او امر امير الامراء وهكذا 
  3. عياده الباطنه.ودي عياده هتدخل تنام علي السرير والدكتور يضغط علي بطنك وخلاص 
  4. عياده الانف والاذن والحنجره . الدكتور بيبص في الاذن لو الطبله مخرومه او كده والانف لو فيه اعوجاج في الحاجز الانفي ولو فيه حاجه من دول حاول تعالجهم قبل التقديم وملحوظه لازم تكون غاسل ودانك عند دكتور قبل متروح الكشف
  5. عياده الاسنان . ودي سهله برضو بيشوف الفكين متطابقين ولا لا وبيشوف الدروس لو بايظين 
  6. عياده الجراحه . بتدخل علي الدكتور وتنزل اللبس وبيمسك الخصيتين وبيخليك تكح عشان يشوف فيه دوالي ولا لا وبعد كده بتلف وتوطي وبيشوف فيه عمليات بواسير او عمليات تانيه 
  7. عيادات الرمد . ودي بتقيس النظر عباره عن لوحه فيها دواير بتقف علي مسافه معينه والعسكري بيشاور علي علامه وانت بتقول مفتوحه في انهي اتجاه وطب عسكري وفنيه عسكريه مسموح ليهم يكشفوا بالنضاره 
  8. عمي الالوان . ودي بتبقا قبل ما تدخل عياده الرمد بيبقي فيه ضابط واقف بورق وفيه ارقام وانت بتقولو العدد اللي مكتوب كام 
  9. عياده العظام . ودي من اصعب العيادات اللي كتير بيسقط فيها بتدخل تقف سبعه بيشوف شكل الجسم لو مش متناسق بيطلعك من قبل ما الكشف يبدأ وبعد كده بيشوف التقوس واللتصاق الفخدين وتراكب الركب وعدم تناسق الفقرات وهيخليك تعمل 3ضغطات وياريت تركزو في الكشف ده
  10. عياده الجلديه . بتدخل العياده والدكتور بيشوف عرق الايدين اللي عندو املاح كتير بيخرج وبعد كده بيشوف حب الشباب لو كتير هتسقط وبعد كده بيشوف لو فيه غرز او تعاوير لو فيه بشكل كبير بتخرج وبيشوف الحروق والوحمات لو فيه باينين اوي بتخرج 
 ------------------------------
بعد متخلص كده اليوم الاول خلص هتروح تلبس هدومك وتستني عشان تسمع نتيجتك .بعد متخلص هتلبس لبسك وتستني نتجتك
-------------
اليوم التاني
 -------------
  1. عياده اشعه علي الصدر:ودي عباره عن جهاز بتحط صدرك عليه وده سهل ان شاء الله
  2. عياده القلب:الدكتور بيحط سماعه علي قلبك وبيسوف نبضات قلبك وحاول وانت داخل العياده دي تبقي هادي ومتجريش عشان ضربات قلبك متزدش
  3. عياده رسم القلب:ودي بتنام علي السرير وبيركب جهاز علي قلبك ومشابك كده في رجلك وايدك وبيطلع رسم القلب من جهاز
  4. عياده الموجات الصوتيه:ودي بتبقا اشعه علي الكليتين
  5. عياده قاع العين:وما ادراك ما قاع العين هيتحطلك قطره بتحرق العين وبتدخل تقف صف والدكتور بيعدي منظار علي العين بعد كده بتقعدعلي جهاز بتحط عينك فيه والجهاز وده بيكشف حالات الحول والنظر الضعيف وعمليات الليزك

الكلية الحربية - شرح مفصل لاختبار الرياضي متخصصين ذكور



إختبار الرياضي لمتخصصين حربيه ذكور
---------------------------

بيتـم تأدية جميع التمارين الخاصة بالاختبار الرياضي في يوم واحد
توضيح :
------------
الدرجة النهائية في الاختبار الرياضي 200 درجة و الحد الادنى لإجتياز الاختبار الرياضي 100 درجة و الاولوية لصاحب الدرجات الاعلي
-------------------------------------

تـعليمات هامة للأختبار الرياضي

لازم تـكون واقف قدام بوابة 5 في الساعة 6 صبـاحاً في اليوم المحدد ليك في بدأ الإختبار والي هتعرفه لو ربنا كرمك و عديت الكشف الطبي
و لازم تـكون ملتزم بالزي الرياضي ( فـانلة - شـورت - شراب طويل - كـوتشي رياضي )
و كمـان لازم يكون معاك مايوه عشـان اختبار قفزة الثقة و السباحة
-----------------------------------

الاختبارات :

أولاً قـفزة الثقـة :
-------------------
- قفـزة الثقة هي أول أختبارات الرياضي في الكلية الحربية ولازم عشان تكمل باقي الاختبارات في الكلية الحربية تكون - - أديت قفزة الثقة بنجاح .
- بيـتم اداء قفزة الثقة من حمام سباحة الكلية الحربية على ارتفاع 7.5 متر .
- كل طالب بيمـنح فرصة واحدة فقط لا غير في اداء قفزة القفة
- ليك 3 ثواني تقفز فيهم لو أتأخرت عن الـ 3 ثواني تعتبر مقصر وملكش اي حق في انك تطالب بأداء القفزة مرة تانية وملهاش أي التماس
- بيـتم اداء قفزة الثقة بطريقة عمودية بحيث يكون الجسم مستقيم
- ممـنوع تماماً تلمس اي جزء من اجزاء المنط اثناء قفزة الثقة باستثناء القدمين فقط طبعاً
- طريقـة أحتساب النتيجة بتكـون ( مضـى – قصر )

ثانياً أختبار السباحة :
------------------------
- أختبار أجباري للطلبة المتقدمين للكلية البحرية وأختياري لباقي الطلبة المتقدمين لباقي الكليات و المعاهد العسكرية
- عند بداية الاختبار بيقوم الطالب بالوقوف عند حافة حمام السباحة
- بعدها الظابط المسئول بيقول خذ مكانك بعدها بيطلق صفارة البدء
- لما تسمع اشارة البدء بتـنط في المية و تقوم بالسباحة بسرعة من غير اي توقف في خط مستقيم في الحارة المخصصة لك لحد الوصول لخط النهاية
- طريقة احتساب النتيجة
طـول حمام السباحة في زمن اقل من 60 ثانية = 20 درجة
طول الحمام بدون زمن 50 متر = 15 درجة
عرض الحمام بدون زمن 25 متر = 10 درجات
عدم استكمال العرض = صـفر من الدرجات

ثالثاً أختبار الضغط :
---------------------

- عـند بداية الاختبار بتـكون واخد واضع الانبطاح المائل على الارض بحيث جسمك يكون مفرود على استقامة واحدة و مافيش اي تقوس لاسفل او لأعلى و الذراعين مفرودين و المسافة بينهم بتكون اتساع الصدر ونظرك للامام
- الظابط المسئول معاك بيحط قبضة ايده على ارتفاع معين ولما يديلك اشارة البدء بتـقوم بثني الذراعين وتبدء في التمرين ولازم تلمس قبضة ايدة الظابط في كل مرة
- بتستمر في اداء التمرين لاكتر عدد ممكن

طريقة احتساب النتيجة :
---------------------------

أقل من 15 عدة = صفر من الدرجات
15 عدة = 15 درجة
20 عدة = 20 درجة
30 عدة = 30 درجة
40 عدة = 40 درجة
الدرجة النهائية للأختبار 40 درجة .

رابعاً أختبار البطن :
------------------------
- بتتـخد وضع الرقود على الضهر مع ثني الركبتين بحيث يكون الركبتين مضموتين
- بتـشبك صوابع ايدك مع تقاطع الابهامين و وضعهم اعلى الصدر مع ملاصقة الكوعين للجذع طول فترة الاختبار
- لما يديلك الظابط اشارة البدء بتقوم بثني الجذع لقدام للوصول لوضع الجلوس بحيث يلمس الطالب الساعدين أعلى الركبتين ثم الرجوع
- يستمر الطالب في اداء اكبر عدد من المرات الممكنة في زمن دقيقة ونص 90 ثانية

طريقة احتساب النتيجة :
----------------------------

أقل من 15 عدة = صفر درجات
15 عدة = 15 درجة
20 عدة = 20 درجة
30 عدة = 30 درجة
40 عدة = 40 درجة

الدرجة النهائية لأختبار البطن 40 درجة

خامساً أختبار العقلة :
------------------------

- بتـقف تحت جهاز العقلة ولما يديلك الظابط اشارة البدء بتقوم بالتعلق على العقلة و قبضة ايدك لفوق
- بتـبدأ بأداء الاختبار من خلال شد ذراعك لرفع جسمك جسمك لحد لما توصل بذقنك فوق عارضة العقلة
- بتقوم بأداء التمارين اكبر عدد ممكن المرات

طريقة احتساب النتيجة :
----------------------------

أقل من 4 عدات = صفر درجات
5 عدات = 20 درجة
6 عدات = 24 درجة
8 عدات = 32 درجة
10 عدات = 40 درجة

الدرجة النهائية للاختبار 40 درجة .

سادساً أختبار التوازن :
--------------------------

- بـيقف الطالب ورا عارضة التوازن ولما يديلك الظابط اشارة البدء بتـقوم بالصعود على العارضة المايلة بعدها تتحرك في خط مستقيم لنهاية العارضة و تلف وترجع مرة تانية في خط مستقيم و تنزل من العارضة المايلة
- التمرين من مرة واحدة فقط
- و تعتبر مقصر في الاختبار في حالة وقوعك سواء وانت رايح على العارضة او و انت جاي

طريقة احتساب النتيجة :
--------------------------
( مضـى – قصر )
الدرجة الممنوحة على اختبار التوازن " 10 درجات "

سابعاً أختبار الجري لمسافة 100 متر :
--------------------------------------
- بيتخذ الطالب وضع الاستعداد خلف خط البداية في الحارة المخصصة ليه
- بعدها الظابط بيديلك التعليمات كالتالي بالترتيب " خد مكانك أستعد صفارة البدء "
- لما تسمع صفارة بالدء بتبتدي تجري بأقصى سرعة بدون اي توقف في الحارة المخصصة ليك حتى الوصول لخط النهاية .

طريقة احتساب النتيجة :
---------------------------

14 ثانية = 10 درجات
15 ثانية = 8 درجات
16 ثانية = 7 درجات
17 ثانية = 6 درجات
18 ثانية = صفر من الدرجات

الدرجة النهائية على اختبار الجري 100 متر " 10 درجات "

ثامناً و أخيرا أختبار الجري 1500 متر :
----------------------------------------

- بيقف كل الطلبة على خط البداية ولما يديلكم الظابط اشارة البدء بيجري كل الطلبة في خط سير المحدد لمسافة 1500 متر
- الجري بيتم على طريق اسفلتي و غير مسموح تماماً الجري على الرصيف
- غير مسموح بمخالفة خط السير اثناء الجري
- في حالة الوقوع لأي سبب بيقوم الطالب بسرعة ويكمل الطالب الجري مع زمايله و مش هيتم ايقاف الزمن او اعادة الاختبار لأي سبب

طريقة أحتساب النتيجة :
-----------------------------

عند الوصول لخط النهاية بتستلم كارت مكتوب عليه الزمن الي جريت فيه وبيتم ترجمة الزمن ده لدرجات

6فترة دقايق = 40 درجة
الفترة ما بين 6.1 لـ 6.30 دقيقة = 30 درجة
الفترة ما بين 6.31 لـ 7 دقايق = 20 درجة
أكتر من 7 دقايق = صفر من الدرجات

الدرجة النهائية لاختبار الجري 1500 متر هي 40 درجة
--------------------------------------------------------------------------------
و بكده بيكون أنتهى الاختبار الرياضى بالتوفيق للجميع في اجتيازه

الكلية الحربية - تفاصيل الاختبار الرياضي لمتخصصين بنات

 

الاختبار الرياضي متخصصين بنات

الاختبار الرياضي عباره عن سبع حجات :
---------------------------------
  1. ضغط عليه 40 درجه
  2. بطن 40 درجه
  3. جري 100 متر 10 درجات
  4. جري 400 متر 40 درجة
  5. وثب من ثبات 20 درجة
  6. اتزان ع عارضه التوازن 10 درجات
  7. المرونه أو الزجزاج Z عليه 40 درجة

كدا المجموع الكلي 200 درجه ودرجة النجاح بتبقى من 100 درجه

نبدأ شرح كل لعبه فيهم
--------------------------------

بس قبل الشرح انتي لما بتروحي بيكون معاكي ترينج رياضي وكوتشي ولا يفضل الحجاب وهناك هيدخلوكم ف مكان بتغيرو فيه وبعدين بتتوزعو مجموعات وتبداو بقا ف الاختبار

اولا الضغط :
----------------------
وعليه 40 درجة مطلوب منك 20 عدة غير محدد بوقت

ثانيا البطن :
-----------------
وعليه 40 درجه مطلوب منك 40 عده ف دقيقتين بس بيتميز ده بحاجة انك مش بتعملي ال 40 عده مره واحده لا انتي بتعملي 20 ف دقيقة وال 20 التانية ف الدقيقة التانيه لو عملتي أقل من 5 عدات بتاخدي صفر

ثالثا الجري لمسافة 100 متر ف 14 ثانية :
----------------------------------------
وعليه 10 درجات ولو جريتي ال 100 متر ف 15 ثانية بتاخدي 9 درجات وهكذا كل اما تزيدي ف الوقت تنقص منك درجة

رابعا الجري لمسافة 400 متر(الضاحية) :
---------------------------------------
وعليه 40 درجه ف زمن 65 ثانيه ولو جريتي ف 65 ثانية بتاخدي 40 درجة ولو جريتي من 65 ثانية لحد 120 ثانية بتاخدي 20 درجه زوتي ف الوقت صفر... بيبدأ الاختبار ده انك بتقفي ورا خط البداية ولحد اما الظابط يقول التعليمات (خد مكانك_استعد_صفاره الانطلاق) وتستلميها جرى يافرس بعد كدا

خامسا الوثب من ثبات :
-------------------------
عليه 20 درجه هتقفي عند خط معين وهب تقومي تنطي لقدام بمسافة لا تقل عن 105 سم... لو جبتي 105 سم بتاخدي 5 درجات لو أقل صفر ولو جبتي 120 سم بتاخدي الدرجه كامله 20

سادسا الاتزان ع عارضه التوازن :
---------------------------------
عليه 10 درجات عارضة التوازن دي عبارة عن لوح عرضه 5 سم ارتفاعه عن الأرض 120 سم طوله 360 سم انتي بقا بتمشي عليه رايح جاي لو عملتيه كله (مضى) بتاخدي 10 درجات معملتهوش (قصر) بتاخدي صفر

سابعا المرونه الزجزاج Z :
----------------------------
عليه 40 درجه وده عباره عن حواجز مرسومة ع حرف Z يعني عند كل ركن ف الحرف ده بيتحط حاجز وده بيكون ع مسافه 25 متر ف 30 ثانية وده بيتم من خلال انك بتجري بين الحواجز ف الوقت المحدد ولو جريتي ف اكتر من 35 ثانية صفر 
 
-------------------------------------------------

كدا انا قلت الاختبار الرياضي كلو وطبعا لو ف اختبار عملتيه ف أقل من الوقت المطلوب بتاخدي الدرجه كامله وتفوق رياضي
--------------------------------------
توضيح بالنسبه للشهادات الرياضيه :
لو معاكي شهادات رياضيه ودبستيها ف الملف هيختبروكي ف الرياضه ال واخده فيها شهاده تقدير وطبعا بتاخدوا درجات زياده عليه وبتنكتب ف الملف بتاعك وبتفيدك جدا جدا ف الهيئه وبتعتبر نسبة نجاحك عاليه جدا

الكلية الحربية - معلومات مفيدة للضباط الاحتياط بخصوص التقديم كا متخصصين


هل انا كضابط احتياط لي الاولويه فى القبول ؟؟
 
هقولك نعم بس فى حاله واحده لو وصلت للعرض العام ودرجاتك متقاربه مع زمايلك او متساويه ليهم
وبيتم ذكر اثناء الاعلان انه لا يوجد اى استثناء للضباط الاحتياط

الاستثناء دى بتكون فى الشروط بمعنى ان لازم يكون متوافر فيك كل حاجه زيك زي غيرك ان تكون جايب تقدير اعلى من مقبول وسنك لايزيد عن 26 سنه وهكذا
اما لو وصلت للنهائي فصدقنى هايكون ليك اولويه اساسا ملفك بيكون ليه استثناء وبيتختم عليه ختم ضابط احتياط وبيتاخد فى الاعتبار انك عشت الميري وعشت تحمل المسؤليه وجايلهم معمول تحريات عليك قبل كدا وخلى بالك بيسألك انت فى سلاح ايه ومهمتك ايه وهكذا لازم اتكون محضر اجابه السؤال دا كويس وادائك للتحيه يكون مضبوط.
مش معنى انك وصلت للنهايه ووصلت للعرض العام ومنتظر النتيجه النهائيه انك كدا تبقي قبلت لا دي عامله زي مسابقه جري وانت بتجري انت وصحابك واللى هايقدر يجري فيكم هايوصل لخط النهايه ومش معنى انك وصلت لخط النهايه تبقي فوزت .
لا .لان فى وقت بيحكمكم هانبدأ نبص للوقت ونصفيكم مركز اول وتانى وتالث وهكذا .بالضبط اختبارات الحربيه عامله كدا..

هل لو انا قبلت هاقدر اكمل بيقوله الجيش صعب ؟ انا نفسي ادخل بس خايف لتكون حياتى صعبه ؟ومقدرش اعيش؟ 
 
تمام فى الاول اكيد كلكم مقدمين علشان مكان كويس ومؤسسه كويسه بتهتم بافرادها وبتكفى كل احتياجتهم وطلباتهم دا طبعا مافيش شك فيه وخصوصا انكم كلكم فى مرحله محتاجين استقرار سريع
انك تشتغل فى مكان كويس يقدرك وينميك ويطور منك ويساعدك ع انك تكبر وتنجح وتقدر بسرعه تفتح بيت وتستقر وتنسى متاعب الحياه دا اكيد السبب الاول والاخير لتقديم كل واحد فيكم وغير كدا
بالنسبه لي شعارات
انا نفسي اخدم بلدى انا نفسي امووت علشانها انا عاوز اضحى بحياتى فى سبيلها وانا وانا وانا كلنا عارفين انها شعارت وكلنا عارفين اننا بنحور ع بعض ولو حد سالك وقولتله الكلمتين دول هايعرف انك بتحور ليه وهايتضحك من جوا فلو اتسالت السؤال دا فى الهيئه يكون اجابتك لاهتمامها بافرادها والعمل ع تطويرهم وسد كل احتياجاتهم وزرع فيهم كل النبل الشريفه دى الاجابه الصحيحه لان اساسا لو انت كل اهتمامك فقط انك تخدم بلدك فانت تقدر تخدمها من اى مكان انت فيه بمعنى انك لو بتزاكر تذاكر كويس وتطور من نفسك وتجتهد فى دراستك وتتخرج وتساعد البلد انها تتطور بعلمك وتعلم غيرك وفى اى مجال لو دكتور فانت هتعالج الناس فبتخدم بلدك لو علوم هاتعمل ابحاث وهاتعمل ماجيستر ودكتوراه وترفع من قيمه نفسك وقيمه بلدك ومستواها العلمى دا هايكون الرد علبيك من اى حد لو كانت اجابتك عاوز اخدم بلدي لان كله بيخدم فى مجاله وبردو دا ماينكرش انك تكون شايف ان خدمتك لبلدك وانت فرد جيش تختلف تقريبا اساسا كتيير منكم حابب انه يكون فرد جيش ودا اللى بيفكر فيه بعيدا عن اى مزايا.

الكلية الحربية - نصائح ومعلومات مفيدة للطلاب المتقدمين للالتحاق بقسم الضباط المتخصصين


معلومات هامة تفيد في تميز الطالب وتساعدة في القبول

اولا متخصصين
----------------------------------------------------
بالنسبه لعائله الطالب :
-------------------

  1. مؤهل الوالد والوالده ( مؤهل عالي - فوق متوسط - متوسط)
  2. والد الطالب او اخوه او عمه او ابن عمه ( هل هم احد افراد القوات المسلحه ام لا)
  3. المستوي التعليمي للعائله ككل
----------------------------------------------------
ثانيا : بالنسبه للطالب :
--------------------

  1. التقدير العام للطالب ( امتياز - جيد جدا - جيد)
  2. المستوي الطبي للطالب ( لائق ام غير لائق)
  3. المستوي الرياضي للطالب ( الدرجه الحاصل عليها ف الاختبار الرياضي)
  4. قدرات الطالب والمستوي الرياضي ( الاخنبار النفسي - واختبار المعلومات عن مصر)
  5. الشكل العام للطالب او الشكل التناسقي للطالب ( بعيدا عن وزنه مثالي مع طوله ام لا)
  6. البطولات او الشهادات اللي حصل عليها الطالب :
( ودي من اقوي النقاط الموحوده وكفيله انها تدخلك ع طول من غير اي حاجه لو وصلت للنتيجه النهائيه وباكدلك لو معاك اي بطوله ع مستوي الجمهوريه ووصلت للهيئه فانت ان شاء الله هتكون من المقبولين وملفك اثناء الاختبار بيكون مستثني وبيتختم عليه ختم التفوق الرياضي ) 
 
نقاط كتير من فوق مش شرط تكون موجوده للقبول ولكن بتميزك وبأهلك عن زميلك ال مقدم معاك بمعني :
مثلا النقط ال فوق بيكون لكل نقطه فيها درجات واجمالي الدرجات ليك هو ال بيؤهلك للقبول بغض النظر انت جبت ف نقط درجات كبيره وف نقط تانيه درجات قليله مع الاخذ ف الاعتبار بردو المستوي الادني للقبول.
-------------------
ع سبيل المثال :
مؤهل الوالد والوالده مؤهل عالي فبتاخد 20 درجه من 20
مؤهل فوق المتوسط فبتاخد 15 من 20
مؤهل متوسط فبتاخد 10من 20
ولو مفيش مؤهل دا تقريبا بيبقي تخطي الحد الادني للقبول وتقريبا بيترفض
انت ممكن تكون شايف ان دا ظلم للفرد ال اهله مش متعلمين لكن هو بينظر ليها انه بياخد فرد تقريبا المستوي الثقافي العلمط لكل ال حوليه عالي فبالتالي بيكون المستوي الثقافي عنده عالي
زيها زي اي مؤسسه او شركه بتقدم ليها بتختار افضل العناصر الموجوده والمتقدمه ليهم فيما يتعلق بشغلهم والجيش شايف ان المستوي الثقافي دا بيتعلق بافراده وبالتالي بياخد دي ف الاعتبار دا ظلم او مش ظلم مش بتاعتي انا
-----------------------------------
وبالنسبه للطالب ال بيكون حد من عيلته من افراد القوات المسلحه
بياخد 200 درجه اضافيه
وبتعتبر تزكيه وبيكون اثناء اختياره ضامن انه مش هايكون عنده حاجه ولا لعائلته ف التحريات علشان اخوه او والده اتعمل عليهم تحريات قبل كدا
--------------------
وتقديرك كمثل هل يفرق معاك ؟
اه هيفرق معاك
-------------------
هل كدا الناس ال جايبه جيد مش هايقبلوا ؟
لا هايقبلوا لانهم واخدين ف الاعتبار ان تقديرهم قليل فبيركزوا ويجمعوا درجات ف باقي الاختبارات وف النهايه بيكونوا اعلي منك
------------------
طب تقدير متوسط ومؤهل والدتي متوسط ومعنديش حد ف العائله ف الجيش ولا حاجه فانا كدا هسقط ؟
لا ابدا تركيزك ف الاختبارات هو ال هيساعدك وموضوع ملكش حد اخ او والد ف الجيش دا ماتخلهوش يشغلك لان نسبه اساسا قليله جدا ال هاتلاقيها مقدمه وليهم حد وقدروا كمان يوصله للنهايه
------------------
طب بعد كدا درجتي ف الرياضي بتفرق معايا ؟
اه طبعا بتفرق كتير اوي ودي حاجه الناس مش عارفاها او عارفاها وبتتحاهلها
يوم الاختبار بيكون ف طلبه قلقانه من قفزة الثقه او انها ماتحبش المستوي المسموح ليهم بالقبول فبيصبرو بعض بالكلام
ياعم دول 100 درجه وهانجبهم وماتقلقش وبتلاقيه‘ بيقضوا يومهم هزار وف الضاحيه بيقولو لنفسهم احنا كدا كدا مانقدرش نكمل او نأدي ف باقي الاختبارات وبيكنسلوا اختبار الرياضي ع اعتقاد انهم كدا كدا مش هايلحقوا زمن او لو لحقوا هايلحقوا مستوي اخير ودرجاته قليله ف مش مستهله انهم يرهقوا نفسهم عليها
اوعي تكون واحد منهم حاول انك تحصل ع اي درجه باي طريقه وماتسيبش اي درجه تضيع منك بالسهوله دي لانك هترجع تندم وترجع تدور وتقول انا ليه مااتقبلتش حتي لو انت شايف نفسك مؤهل انك تدخل عن زمايلك وحصلت كاير ف دفعات سابقه
---------------------------------------


اما بالنسبة بقا للضباط الاحتياط المتقدمين لمتخصصين
 
فاحزر بمعني احزر لو جبت درجه مش كويسه ف الرياضي هاتيجي ف اختبار الهيئه هايتمسح بكرامتك الارض ودي حصلت قبل كدا وقاله انت ازاي ضابط ف الجيش المصري وتكون دي درجتك قاله يا فندم انا كان عندي برد وتعبان ومش قدرت اجمع درجات
قاله انزل اعمل كذا وكذا فانت لو ضابط ودرجتك قليله اعمل حسابك انك هاتتكرش من اختبار الهيئه
من الاخر بتبقي عباره عن مسابقه وال درجاته اكتر بيفوز بيها
1: درجتك ف الرياضي
2: درجتك ف النفسيه
3: درجتك ف معلومات عن مصر
4: ادائك ف احتبار الهيئه
5: تناسق جسمك
6: تقديرك ف الكليه
سعداء بخدمة حضرتكم

الكلية الحربية - شرح يوم سحب وتسليم الملف للمتخصصين


 اولا يوم سحب الملف
-----------------------------------------
ملحوظات عامة للشباب

  1. تخفيف الشعر علي الدرجة الاولي او الثانية
  2. اهتم بمظهرك كويس عشان هتتصور هناك
  3. يمنع لبس اي احذية غير الجزمة او الكوتشي
  4. الحضور بمبلغ 100 جنيه ثمن سحب الملف
  5. احضار قلم ازرق لاي ملاحظات
  6. الحضور مبكرا من الساعة السادسة او السابعة صباحا
  7. احضار البطاقة الشخصية وشهادة التخرج او بيان النجاح

هنتكلم عن اول يوم ليك وهو سحب الملف قبل ما نخش ع الاختبارات :

السحب هيكون من بوابة التنسيق 


بعد ما تدخل بيتم توجيهك سواء لسحب الملف ثم التصوير ثم الشرح ثم الخروج او حسب التريب الي هما ماشيين بيه
لازم تعرفوا ان من اول خطوه ليك ف الكليه بتكون ف مسابقه بينك وبين زميلك وطبعا الافضليه للمتفوق ف الاختبارات ونصيبك محدش هياخده غيرك
هتدخل وهتقضي يومك ومتقلقش هتلاقي معامله كويسه من الظباط لانهم بيتعاملوا مع ناس كبيره
حاول تتجنب اي مشكله وتسمع الاوامر وتنفذها لان مخلفتك لاوامر ظابط مش هيكون ف صالحك وكل حاجه بتتحسب عليك من اول اليوم ده
مش هتاخد وقت كتير وتاخد الملف وتكون ف بيتك
نصيحه مني :
حاول تنجز نفسك وتخلص ورقك وتقدم ف معادك واي استفسار سيبه وهيتم الرد عليه ف اقرب وقت 

ثانيا يوم تسليم الملف
--------------------------------------
ايه الحاجات اللي هاخدها معايا يوم التسليم ؟ 
 املأ الملف بالكامل وثبت صورك فى الأماكن المطلوبة ويجب أن تكون الأختام واضحة والبيانات واضحة ولو فى حاجه مطلوب منها صورة معتمدة ومش معاك يبقا خد الاصل والصورة معاك الكلية وهما هيظبطوا كل حاجه ومحدش يسألنى املا الورق الكرتون ولا لأ املا كل الملف ما عدا الحاجات اللى الكلية بتملاها بنفسها زى الورقة الصفراء وورق الطبى لما تروح تسلم الملف تاخد معاك قلم جاف ازرق وصورك اللى اتصورتها وكارت التردد وبطاقتك ودباسة عشان لو فى حاجه هتدبسها وكارت الطول والوزن و 2 اكلاسيه ومن فضلكم محدش يناقشنى ف الحاجات اللى هتاخدوها عشان صدقونى هتحتاجوها
 يوم التسليم النظام ماشي ازاي ؟ 
الدخول بيكون من باب استاد الكلية الحربية يعني باب رقم 7 لما بتدخلوا بتتوزعوا ع مظلات حسب الطول والمجموع والشعبة يعني العسكري هيقول اللي طوله مثلا 170 و65% ييجي كدة واللي طوله اقل من 170 و60% ييجي كدا . المهم هتقعدوا ف المظلة الخاصة بالكلية و4 ظباط هيراجعوا معاك الملف ولو لقوه مظبوط ومش ناقصه حاجه بيختم عليه ختم (روجع) ولو ناقص حاجه بيقولك ارجع اعملها وتعالى . بعد كده هتروحوا على شباك خاص بالكلية وهتسلموا الملفات والراجل بيلزق رقم القيد بتاعك ف الاماكن المطلوبة فى الملف وبيلزقلك واحد ع كارت التردد وواحد تانى ع ورقة نموذج اجابة السمات بعد كدة هتروح ع شباك تانى يختملك ختم (سمات) ع كارت التردد بعدها هتقعد فى مظلة تمتحن السمات هتلاقي شرح مفصل لاختبار السمات برضو في الموقع هنا
  سعداء بخدمة حضرتكم

الكلية الحربية - الاوراق المطلوبة للمتخصصين حربية



الاوراق المطلوبة

  1. كارت الطول والوزن (تم استلامه وقت سحب الملف)
  2. شهادة حسن سير وسلوك مرفقة بالملف يتم تحريرها بمعرفة الكلية المقيد بها الطالب
  3. صورة وجه بطاقة الطالب – صورة ظهر بطاقة الطالب
  4. صورة معتمدة من شهادة المؤهل أو بيان الدرجات
  5. أصل شهادة ميلاد الطالب المميكنة
  6. صور من شهادات التفوق الرياضي معتمدة من الاتحاد الرسمي للعبة إن وجد
  7. موقف الطالب من التجنيد أو نموذج 110 جند
  8. قيد عائلي للوالد
  9. قيد عائلي للجدين
  10. في حالة عمل والد أو والدة الطالب بالأعمال الحرة يتم إرفاق المستندات التي تثبت ذلك من خلال البطاقة الضريبية والسجل التجاري أو حيازة الاراضى الزراعية أو خلافه
  11. في حالة سفر الوالد أو الوالدة للخارج يتم عمل توكيل لأحد الأقارب للتوقيع على الملف مع إرفاق صورة التوكيل المعتمد من جهة إصداره وصورة بطاقة الوكيل وصورة جواز السفر وصورة عقد العمل موثق من الخارجية وشهادة تحركات من مصلحة الجوازات والهجرة من مجمع التحرير
  12. في حالة وفاة الوالد ترفق شهادة الوفاة أما إذا كان أحدهما أو كلاهما بالمعاش يرفق بيانات المعاش معتمدة من المعاشات أو جهة العمل قبل الخروج على المعاش
  13. صورة وجهة بطاقة الوالد – صورة ظهر بطاقة الوالد
  14. صورة معتمدة من مؤهل الوالد إن وجد
  15. صورة وجه بطاقة الوالد صورة ظهر بطاقة الوالدة
  16. كارت طولي للوالدين معا وفى حالة الطلاق أو الانفصال أو السفر لأحد الوالدين يتم تثبيت صورة منفردة مع كتابة السبب خلف الصورة وفى حالة وفاة أحدهما يتم تثبيت صورة للذي هو على قيد الحياة
  17. صورة معتمدة من مؤهل الوالدة ان وجد
  18. صورة من مستندات الأملاك والمدخرات للوالد والوالده
------------


الاوراق المطلوبه فى القيد العائلى اول حاجه انت هتعمل 3 قيد...
  1. والدك
  2. جدك من ناحيه الوالد
  3. جدك من ناحيه الوالده

اولا قيد الوالد ....

  1. صوره من بطاقه الرقم القومى للوالد او شهاده الميلاد<كمبيوتر> فى حاله الوفاه
  2. صوره لبطاقه الرقم القومى للوالده او شهاده الميلاد كمبيوتر
  3. صوره من شهادات ميلاد الابناء (اخواتك يعنى) كمبيوتر
  4. صوره من وثيقه الزواج فى حاله تعدد الزوجات
  5. صوره من وثيقه الطلاق فى حاله وجود واقعات طلاق
  6. صوره لشهاده الوفاه فى حاله وجود حالات وفاه لأى فرد من افراد الاسره

ثانيا : القيد العائلي للجد ابو الوالد ..

  1. صور بطايق الابناء بما فيهم والدك
  2. صورة بطاقة جدك
  3. صور بطاقة جدتك لو عايشين .. لو متوفيين اللي متوفي فيهم تطلعله شهادة ميلاد ووفاة كمبيوتر

ثالثا : القيد العاءلي للجد ابو الوالدة 

  1. صور بطايق الابناء بما فيهم والدتك
  2. صورة بطاقة جدك وصورة بطاقة جدتك واللي متوفي فيهم تطلعله شهادة ميلاد ووفاة كمبيوتر

ملاحظات

شهادات الميلاد تغني عن صور البطايق وصور البطايق تغني عن شهادة الميلاد

وقيد الجد لابو الوالده نفس نظام ابو الوالد

الكلية الحربية - تحميل اسطوانة معلومات عن مصر الخاصة بالكلية الحربية




تحميل اسطوانة معلومات عن مصر الخاصة بالكلية الحربية التي كان يتم تسليمها قديما عند سحب الملف للطلاب تبع الشرح الاتي :

اضغط علي الرابط التالي للتحميل 

بعد الضغط علي الرابط هيفتح موقع التحميل هتضغط 


وبعد كدا لو بتستخدم انترنت دونلود منجر هيظهر ليك النافذة دي هتضغط بدء التحميل


وتنتظر انتهاء التحميل وتفتح الملف ياي برنامج يدعم ضيغة pdf

بالتوفيق.....

الكليه الحربيه - شرح مفصل لاختبار الرياضي المتقدم





معلومات مهمه قبل ذهابك للاختبار

  1. عدم تناول اي منشطات او ادويه قبل يوم من ذهابك للاختبار قد يؤثر سلبا علي لياقتك
  2. عدم السهر لفترات طويله قبل يوم من الاختبار لقدرتك لتكمله الاختبار
  3. عدم بذل اي مجهود في اليوم قبل الاختبار ويكون اطالات خفيفه لتأخذ الراحه الكافيه 
  4. التدريب علي اداء التمارين قبل الذهاب للاختبار لكي تظل علي استعداد
  5. تجنب تناول اي اطعمة تؤدي الي سرعه التبرز او تؤدي الي الاسهال 

المطلوب للاختبار
  1. تيشرت رياضي
  2. بنطلون رياضي
  3. مايوة سباحة
  4. كوتش رياضي
كما في الاختبار الرياضي السابق

شرح الاختبار


لما تنجح في اختبار العرض العام بي لائق هيقولولك في نفسي اليوم تيجي امتي الرياضي المتقدم وبوابه كام وهتكون غالبا بوابه 4 الي حضرتك دخلت منها اول مره تسحب الملف وتاخد معاك المطلوب الي فوق دا بعد كده يابطل هتخش من البوابه وهتتجمعوه وكلكم وهيدوكم ارقام وفيها استمارات الرياضي بعد شويه هيجي صف ضابط هياخدكم علي التراك او ممكن نطه الثقه الاول علي حسب ميحددوه هما 
قفزة الثقة = 7.5 متر




وبعد قفزة الثقة هتروح مكان اختبار الرياضي اختباراتك هتكون كالأتي :

اختبار الضاحيه 2000 متر في 8 دقائق


بعد متخلص كل ده هتتجمعوه وتستنوا النتيجه الي سقط هيقولوله اما بالنسبه للي نجح فبتختلف من سنه لسنه حسب الحاجه في تحديد اذا كان فيه اختبار معلومات عن مصر او لا ان كان فيه بيقولك هتيجي امتي وكدا وربنا يوفقكم جميعا باذن الله

الكلية الحربية - شرح مفصل لكشف العرض الطبي المتقدم

معلومات مهمه يجب اتباعها قبل ذاهبك للكشف

  1. عدم السهر لتجنب الارهاق والذي قد يؤثر سلبا عليك في الاختبارات
  2. عدم تناول اي نوع من انواع المنشطات اوالادويه التي قد تؤثر في التحاليل
  3. يفضل ان تكون صائم عند ذهابك للاختبار  
  4. حلق شعر الراس والعانة والابط 
  5. احضار سلب ابيض سبعة للكشف
  6. كرت التردد والبطاقة الشخصية
 
شرح الاختبار

العرض العام الطبي هي هي نفس الكشوفات و الاجراءات وزياده عليه :

 كشف المدي السمعي
بتدخل حاجه زي كبينه كده بتدخل بتقفل ع نفسك الباب وبتقعد ع كرسي وبيكون ف قدامك سماعات بتاخدهم وبتحطهم ع ودانك الدكتور بيقولك لو سمعت صوت ف ودنك اليمين ارفع ايدك اليمين لو ف الشمال ارفع ايدك الشمال تكون مركز متشتتش زهنك وكون واعي بال بيحصل عشان تميز الصوت ومتقلقوش هو اسهل مما تتخيلوا

 والكشف عن التشوهات في الجسم 

والتحاليل 
للكشف عن لو فيه فيرس او تلوث في الدم وهو ده الكشف الطبي التاني الي بيمر بيه الطالب في اختبارات الكليه الحربيه عشان يلتحق بالكليه وده حاجه في كل الكليات العسكريه ولازم الطالب يكشف بس هو هيكون بسرعه وفي يوم واحد بس


الهدف من اجراء الكشف العرض الطبي العام

هو التاكيد علي صحه وسلامه الطالب ولياقته الطبيه وميكونش اتعرض لاي نوع من انواع الاصابه زي كسر اومرض او اي نوع من التأثير الطبي في الفتره مابين اختباره للكشف الطبي العادي والكشف طبي عرض عام وبيكون بردو لو فيه حاجه اتفوتت في الكشف الطبي العادي او متكشفتش فيه بتتعرف في العرض العام وبيكون دقيق اكتر من الطبي العادي وطبعا مفهوش التماس زي العادي سقوطك في اي كشف انت كده للاسف مش هتكمل اختبارات


وطبعا معاد الكشف هيجيلك ان شاء الله في رساله الهيئه لو لائق ان شاء الله هتعرف امتي المعاد وغالبا بيبقا 6 الصبح وبعد لما الكشف يخلص كل واحد هيعرف نتيجته في نفس اليوم والي عدي هيقولولك معاد الرياضي المتقدم واخر شئ معلومات عن مصر وبعد ذلك انتظار النتيجه النهائيه

ازاي اعرف اني نجحت ؟؟
اولا مش بتعرف نتجتك ف اليوم ده دي هتجيلك ف رساله وبيحددلك فيها الرياضي المتقدم
لكن لو عديت اليوم عادي والكارت ما اتخدش منك او ما اخدوش اسمك تطمن انت كده ف السليم وتنتظر الرساله
بالنسبه للتحريات 👇👇
التحريات بتفضل شغاله لغاية النتيجه النهائيه 


 وربنا يوفقكم ان شاء الله 

الكلية الحربية

عرض المزيد »

كلية الشرطة

عرض المزيد »